Kek Şefîq

Dinya biveşayêne Şefîqî eleqedar nêkerdêne, xemê ey nêbi. Verê Ulî Camî de yew dezgeyê estbi, ser o çîyê sêmênî rotêne. Qijîya xo ra mi dîyo-nêdîyo Şefîq nê karî keno. Serre duyes aşmî verê camî de vindeno. Ne Newroz ne zî roşanan de dezgeyê xo qefilneno.

Belkî nêweş bikewtêne, îsrehet bikerdêne. Hende çikus bi ke kesî rê çîyêk îkram nêkerdêne. Mesela, cixara nêşimitêne la yowî cixara îkram bikerdêne şimitêne.

Nê nêzdîyan de semedo ke tayê hedîseyî virazîyayî, Dîyarbekir de heme dikanî gêrîyayî. Hema vaje kes akerde çin bî. Labelê Şefîq akerde bi.

Mi ewnîya Şefîq ha akerde, ez şîya verê ey. Mi va, Şefîq, wilay mîyanê nê terteleyî de yow molotof yan bombayê gazî erzeno to, cêr ra cor ti heme veşenî. Mi va, ez vana xo rê şo keye. Şefîqî va, nê bawo, kam qarişê mi beno?

Di rojî vîyartîy, biney ortam bi nerm. Dikanî abîy. Mi xo bi xo va, no Şefîq yan merdimêko jêhatî yo yan zî tersek o. Mi va, ez yow yarî bikerî. Mi va, Şefîq, yow mesela esta, zaf muhîm a. Ez îta eşkera nêkena, bê ma şirin qewe.

Ma şî qewe, mi va, Şefîq, ez vizêr şîyêne keye. Kuçe de rastê çend xortan ameya. Mi ê xortan ra yew nas kerdêne. Destê înan de defterêk esbti. Lîsteya dikanê ke a roje akerde bîy, tede nuşte bîy. Wexto ke ez honyaya lîste ra ke nameyê to zî tede estbi!

Şefîq tersa, recefîya. Mi va, bawer bike, ez vizêr ra nat ha xebetîyena ke nameyê to sîl bikerî. Şefîqî ra sowt birîya. Qewecî ra awe waşte, awa xo şimite. Va, qey Homayî, ti înan ra vajî, wa nameyê mi sîl bikerê. Şefîq vejîya şi. Dezgeyê xo top kerd. Û rayîrê keyeyî girewt.

Kamî persê Şefîqî kerdêne, mi vatêne, belkî nêweş o. Mi raşta mesela kesî ra qal nêkerdêne. Roja hîrêyine ez û çend umbazî ma şîy keyeyê Şefîqî. Mi va, kek Şefîq, wilay zaf zor bi la ma gureyê to hel kerd. Şefîq cayê xo ra pera, erzîya ma, yow bi yow lewî nay ma ra. Ca de pereyî vetîy day lajê xo. Şi ma rê şîrane ard. Ez vana, Şefîqî emrê xo de kesî rê şîrane îkram nêkerdo.

Roja bîne ame dezgeyê xo akerd. Ez ge-ge şina verê ey de ronişena. Mi rê çay îkram keno. Û hertim mi rê teşekur keno.