“Kesayî zî Şênê Bifirê” Bîyo Derse

Fîlmê rejîserorê kurdî Behmen Qubadî “Kesayî zî Şênê Bifirê” wendegehanê Almanya de sey babeta derse nîşan dîyeno. Goreyê ke ajansê ANF nuseno, hetanî ewro 40 hezar wendekaran fîlm temaşe kerdo. Rejîsorê fîlmî Behmen Qubadî zî derheqê na bîyene de vano sey babeta derse nîşandayîşê fîlmî ez zerrîweş kerda.

Badê ke DYA serra 2003 de mudaxeleyê Îraqî kerd û rejîmê Sedamî rijna, rejîsor Behmen Qubadî Kurdîstanê Başûrî de dest bi antişê fîlmê “Kesayî zî Şênê Bifirê” kerd. No fîlmo tewr verên o ke badê şerî Kurdîstanê Başûrî de ancîyayo. Fîlm de mîyanê mayînanê şerî de dramê domananê kurdan nîşan dîyeno. Fîlmê Behmen Qubadî “Kesayî zî Şênê Bifirê” hetanî nika gelek festîvalanê mîyanneteweyîyan de xelatî girewtîy.

Almanya de serra 2005 de dezgeyê dewlete yo bi nameyê “Merkezê Zanistîyanê Polîtîkî yê Federalî” şîrketê vilakerdişê fîlman Mîtosî reyde derheqê fîlmî de yew kitabek amade kerd û sey materyalê derse heme wendegehanê Almanya rê fîlm şawit. Yewîyîya Wendegehan zî na pêşnîyaze qebul kerde. Coka bîy panc serrî ke fîlm wendegehanê Almanya de sey materyalêkê derse nîşan dîyeno. Hetanî ewro 40 hezar domanê ke temenê înan mîyanê 9-16 serran de yo fîlmê “Kesayî zî Şênê Bifirê” temaşe kerdo.

Rejîsorê fîlmî Behmen Qubadî derheqê na bîyene de va, “Eke fîlm wendegehanê welatêkê sey Almanya de sey materyalêkê derse yeno nîşandayene, no çî seba mi beno mezherê keyfweşî ye.”

Behmen Qubadî derheqê fîlmî de va, “Mi bi nê fîlmî waşt rewşa ke domanê kurdan tede yê, jano ke ancenê nîşan bidî. Coka no fîlm seba şinasnayîşê kurdan û domananê kurdan fîlmêko baş o. Ez hêvîdar a ke rojêk fîlmê almanan zî wengehanê welatê ma de seba domananê ma bibê materyalê derse. Û bi no qayde domanê welatanê cîyayan firsend bivînê ke kulturê yewbînan bişinasnê.”

Wayîrê şîrketê vilakerdişê fîlman Mîtosî Mehmet Aktaş ke Almanya de vilakerdişê fîlmê “Kesayî zî Şênê Bifirê” keno, derheqê na babete de wina qisey kerd: “No çîyêko zaf muhîm o ke fîlmêkê kurdan hetê dezgeyêkê cidî yê sey Merkezê Zanistîyanê Polîtîkî yê Federalî ra sey materyalê perwerdeyî yeno gurenayene. Wendegehanê Almanya de nîşandayîşê nê fîlmî de amanc no yo ke wendekarî derheqê tarîx û fîlmê kurdan de bibê wayîrê malumatî. Xora kitabeko ke ma amade kerdo de kîşta malumatanê derheqê muhtewaya fîlmî de ma ca dayo malumatanê derheqê tarîx û kulturê kurdan zî. Ewro ê ke nê fîlmî temaşe kenê domanê ke temenê înan mîyanê seranê 9 ra hetanî 16 de yê. La nê domanî îstîqbal de do bibê îdarekerdox û pêşengê nê welatî. Qismêkê înan do bibê sîyasetkar, qismêk do bibê tarîxnas û sînemakarî. Coka eke na kategorî nika ra kurdan bişinasno û derheqê tarîx û sînemaya kurdan de bibo wayîrê malumatî, no beno çîyêko zaf muhîm.”