Keyedestekê Cinîyan Xizmetê Cinîyan de yo

Merkezê Keyedestekê Cinîyan (Kadın Destekevî Merkezi) ke semtê Xançepekî yê Dîyarbekirî de xizmetê cinîyan de yo, binê îdareyê Beledîyaya Sûrî ya Dîyarbekirî de xebitêno.

Merkezê keyedestekî ke tîya ra qasê di serrî û nême verê cû banêkê otantîkî yê Dîyarbekirî de semtê Xançepekî de kewto fealîyet, di cinîyê ciwanî sey personel tede xebitênê. Nînan ra Sosine, bi eslê xo dewa Licê Pîrike ra ya, koçbera şerê qirêjî ya, tirkî baş nêzana la zaf weş kurmanckî zana. Ayşegule zî bi eslê xo merkezê Dîyarbekirî ra ya, qismê arkeolojî yê unîversîte ra mezun a, baş tirkî zana la kurmanckîya aye zeîf a.

Goreyê melumatê ke Sosin û Ayşegule danê, kursê wendiş û nuştişê tirkî, kursê musayîşê kurdkî (kurmanckî), kursê neqşan û deştişî, kursê kuaforîye, kursê ebrû, kursê cenayîşê erbaneyî zî tede hetanî ewro înan çend kursî organîze kerdê. Heta ke kursê averberdişê kulturî û sosyalîzebîyayîşî zî viraşto.

Vanê, yew menge de tewr tay 50 cinî seba helkerdişê muşkileyanê xo yê tewir bi tewiran, zafanê zî seba peydakerdişê karî muracatê înan kenê. Zafê cinîyan wazenê mêrdeyê xo rê kar peyda bikerê la înan tena cinîyan rê kar peyda kerdo. Mesela, hetanî nika kursîyeranê deştene ra, înan des kesan rê yew atolye de îş peyda kerdo. Hewna nêzdîye ra yew fabrîkayê viraştişê sorawke (turşu) de do 50 cinîyan rê kar peyda bikerê.

Bi têkilîya Keyedestekê înan û bi organîzekerdişê Beledîyaya Sûrî, panc aîleyê ke keye de nanê tenure pewcenê, nanê înan roşenê tayê lokantayanê ke werdê mehelî yê Dîyarbekirî virazenê, danê tayê otel û marketan zî. Bi wasitayê înan gelek keyeyan de şekerê nîşan û veyveyî danê viraştene û roşenê danê tucarêk ke verên a nê karî keno. Hewna, keyeyan de sorawke danê viraştene û roşenê danê beqal û marketan.

Nînan ra teber zî, projeyê înan o tewr balkêş no yo ke parî ra nat bodrumê banêkê kehenî de kufkarikan (mantar bitkisi) hesilnenê. Proje hetê beledîyaya Sûrî ra fînanse beno û na merhele de tena hîrê keyeyî beşdar bîyê. La 60 keyeyanê bînan zî muracat kerdo ke ê zî beşdarê nê projeyî bibê.

Seba proje yew bodrumo ke qasê 60 metrekare yo, hetê beledîya ra restore bîyo, tovê kufkarikan bajarê Qonya ra dîyayo ardene la xizmet hetê aîleyan ra yeno kerdene û karê ey zî aîleyan rê yo.

Goreyê melumatê ke beşdaranê proje ra Azadî day, yew menge de Dîyarbekir de çar tonî kufkarikî yenê rotene. Marketan de kîloyê kufkarikan bi 10 lîra yeno rotene. La marketî înan ra bi 5-6 lîra herînenê. Mehsulê destpêkî de her keyeyî yew ton mehsul roto û teqrîben 5 hezarî lîra kewto destê her keyeyî. Labelê seba ke o cisno verên, yanî kufkarikanê topikan de çend çeşîdê kîmyasalê zerarênî estbîyê, coka înan fek ci ra veradayo û nika cisnêkê bînî yê organîkî ser o xebitênê. Azad vano, derheqê hesilnayîşê kufkarikan de ê nêeşkayê zêde pisporan ra ardim bigîrê. Çunke pisporê nê karî Dîyarbekir de peyda nêbenê. Vano, zafê melumatî mi înternet ra arêday. Nika ma bi nê ceribnayîşî vera-vera benê wayîrê tecrubeyî û ma bi xo benê pisporê hesilnayîşê kufkarikan. Pîyê Azadî vano, ma hende bala xo daya nê projeyî ser ke êdî ma zanê tena kurmanckî de da-des nameyê kufkarikan estê. Birastî kirdkî de zî gelek nameyê xo estê: sung (n), kufkarike (m), patike (m), kilaweke (m), qampîreke (m)

Berpisrîyarê Merkezê Keyedestekê Cinî

yan yê semtê Xançepekî Sosin û Ayşegule vanê, nê projeyan ra teber zî ma çend rey aktîvîteyê kulturî yê sey birnayîşê şerîyeyî, viraştişê danîyan zî organîze kerdê. Nê fealîyetî hem kulturê ma yê kehenî newe ra zinde kenê hem zî bi no hawa cinîyê ma sosyalîze benê.