Keyepelê DêrsimInfo Xizmetê Kirmanckî de

Keyepelê DêrsimInfo tora Înternetî ser o adresa http://dersiminfo.com/ de xizmetê kirmanckî (zazakî, kirdkî, dimilkî) de yo.

Keyepel de zafane xeberê magazînel û aktuelî yê wareyanê sey sîyaset, ekonomî, huner, kultur, tenduristî, teknolojî û sporî de weşanîyenê. Ziwanê keyepelî goreyê qeraranê Grûba Xebate ya Vateyî redakte beno la hîna vêşî fekê Dêrsimî ser o yo.

Redaksîyonê keyepelî nê derheqî de wina vano: “Ma îdarekerê keyepelî zafane bi fekê Dêrsimî nusenîme la ma wazenîme ke dêrsimijî kî giran-giran ziwano standardîzekerde bimusê, ameyoxê ziwanê xo bivînê û xo hazir bikerê. Ma meylê Grûba Xebate ya Vateyî ke 1996 ra bi nat kirmanckî ser o gureyena û kombîyayîşan de qaydeyanê gramerî û rastnuştişê çekuyan tesbît kena, sey bingeyê nuştişî gênîme. Ser o vindenîme ke şar ziwanê xo newe ra nas bikero, çekuyanê newe û cîya-cîyayan bimuso. Xo vîr ra mekerîme ke kirmanckî tena Dêrsim de nêna qisey kerdene. Eke her kes vano qey fekê dewa xo kirmanckîya rast a, ma apey manenîme û ziwanê xo xo dima veradanîme. Nê rîyî ra ma xeberanê xo zafane basît virazenîme û cêr ra hertim tayê çekuyan bi tirkî îzeh kenîme, ceribnenîme ke bi metodanê audîo-vîsuelî (hesnayîşkî-dîyayîşkî) tehmê ‘kirmanckîya newîye’ tenêna weş bikerîme, no ziwan geş bikerîme. Eke merdimêk vajo, ‘Ez ziwanê şima ra fehm nêkena’, gerek xo ra biperso, çayê fehm nêkeno.”

Nuşteyê redaksîyonê keyepelî de wina dewam beno: “ Eke merdim qayîtê zafê keyepelanê bînan ê dêrsimijan bikero, do bivîneno çîyo ke ê temsîl kenê, bêser û bêbin ê. Ne ziwanê înan standardîze yo ne kî polîtîkaya înan eşkera ya. (…) Nuştoxê zanayeyî tay ê. Wendoxî tay ê. Aye ra armanc û hedefê ma reqabet ney, hertim zêdenayîşê îmkan û kalîteyê keyepelanê kirmanckî yo. Çiqas ke nameyê nê keyepelî DêrsimInfo yo, ma tena Dêrsimî ser o nêvindenîme, ma verê xo danîme pêroyê welatê xo. Hem Kurdîstan ra û hem kî dinya ra xeberan pêşkêş kenîme…”

Derheqê amancê keyepelî de zî wina vajîyeno: “DêrsimInfo yew hewcedarîye, gamêda lazime bîye. Seke zanîno, kirmanckîya ma verê tehlukeyê vîndîbîyayîşî der o. Şarê ma ziwanê xo ra keweno dûrî. Raver ra ma xo ra pesa, Înternet û teber ra xeylê medyayê kirmanckî, keyepelî, kovare ûsn. estê, gelo çayê miletê ma hewce nêvîneno ke ziwanê dayîka xo de biwano, binuso, qisey bikero la herinda naye de zeleqîyayo ra ziwanêde bînî, zafane kî tirkî? Cewabê nê persî yew nîyo, asan kî nîyo. Yew rastîya nê cewabî kî a ya ke şarê ma ziwanê xo ra hende, fikirîyayîşê ma yê verênî ra zêde kewto dûrî, qiseykerdiş de zehmetîye anceno, wendiş û nuştiş ra bêzar beno. Hetanî ke destebera ma ra bêro ma nuşteyanê atraktîvanê balkêşan bi hawayêde rehet pêşkêş bikerîme ke şarê ma –ma pîya– reyna bêro xo ser û dest pira no, qîymetê ziwanê xo her roje xo rê bivîno.”