Keyepelê Zazakî.Netî Yewserre yo…

Tam bî serrêk ke keyepelê Zazakî.Netî fealîyet de yo.

Keyepelê kirmanckî (zazakî) Zazakî.Net adresa www.zazaki.net de par roja 20.08.2009 de bêîddîa, bi hawayêko mutewazî dest bi weşane kerd.

Keyepelê Zazakî.Netî mîyanê serrêk de, se ra newayê înan bi kirmanckî (kirdkî, zazakî, dimilkî) dorê 600 tene nuşteyî (meqale, xebere, roportaj, bîyografî yan zî sewbîna nuşteyî), dorê 100 tene meqaleyê nuştoxan, 21 albumê fotografan û 63 tene vîdeoyî weşanayê. Nuşteyanê kirmanckî ra ê ke hewteyêk ra ver keyepel de aliqnîyayê, tewr tay 275 rey, tewr zaf 2130 rey ameyê tiknayene. Merdim şêno bi asanî vajo ke her nuşteyê kirmanckî tewr tay teqrîben hetê 300 kesî ra ameyo wendene.

Aşma verêne 24 saetan de teqrîben 100 IPê cîya-cîyayî dekewtêne keyepel. Goreyê reqema roja 19.08.2010, yew roje de 480 IPê cîya-cîyayî keyepelî zîyaret kenê. Hetanî ewro 45 hezarî û 439 IPanê cîya-cîyayan keyepelê Zazakî.Netî zîyaret kerdo û têpîze de her IP 4 deqîqeyî û 41 sanîye keyepel de mendo.  

Roja ke keyepelê Zazakî.Net dest bi weşane kerdo hetanî ewro, hema vajîn ke tewr tay her roje yew nuşte ro keyepelî bar bîyo. Yanî, keyepel her tim rojane bîyo. Heto bîn ra, keyepelê Zazakî.Netî ewro sey yew arşîvêkê muhîmî yê lehçeya kirmanckî yo. Kesê ke biwazê derheqê na lehçe de bibê wayîrê malumatî, bi asanî şênê gelek hetan ra fotografêko muhîm yê na lehçe bivînê. 

Weşanayîşê nuşteyan de hetanî ke ma ra ameyo, hetê rastnuştiş û qaydeyan ra ma ziwan rast şuxulnayo. Xora prensîb û hesasîyetê ma yo tewr sereke no yo ke ma ziwanî standard û rast bişuxulnin. Nê hetî ra, nuşte û xeberê ke ma bi xo amade kerdê de zêde muşkileyê ma çin bîy. La nuşteyê ke teber ra ameyê, ma bi ezîyet û kedêka muhîme redakte kerdê, hîna weşanayê. Redaktekerdişê nuşteyanê teberî de bineyke problemî estê. Nê probleman ra qismêk wina yê: nuştoxî wina hesab kenê ke nuşteyê înan redakte beno coka ehemîyet nêdanê rastnuştişî; herinda ke her nuşte de xo bineyna aver berê, tam tersê ey, her nuşte de apey şinê û bi no qayde karê redaksîyonî zehmetêr kenê. Qismêk nuştoxî zî estê ke îtîraz ro redaktekedişî kenê, tetbîqkerdişê qaydeyanê gramerî qebul nêkenê, bitaybetî îtîraz ro formê çekuyan kenê.

Ma nêzanê wendoxî û şarê ma çiqas teqdîr keno la wareyê Înternetî de seba lehçeya kirmanckî na xebate performansêko bêemsal o. Merdim şêno bi asanî vajo, na reya verên a ke bi xebata Zazakî.Netî lehçeya kirmanckî (zazakî) de xeberê rojaneyî amade benê û weşanîyênê. Yanî, bi no qayde yew ziwanê çapemenîye ameyo meydan. Qet nêbo, wareyê rojnamegerîye û amadekerdişê xeberan de nika gelek numûneyî verê destê ma de estê. Bi no qayde, îsbat bi ke sey ziwanî tu kêmanîyêkê kirmanckî (zazakî) çin o. Eke merdim wayîrîye bikero, kirmanckî (zazakî) şêna her ware de bêro şuxulnayene.  

Helbet ma nêvanê kêmaneyê ma çin ê, bêguman estê. La ganî ma xo vîrî ra nêkerin ke na xebatêka mutewazî ya kesane ya. Keremê zerrî ra û bi îmkananê şexsî bena. Kesê ke ardim bikerê, hetkarîye bikerê, piştgirîye bikerê û moral bidê ma, zaf kêmî yê. Eke zaf kêmî bê zî, kamî bineyke ardim kerdo, yan moral dayo ma, ma hemîne rê sipas kenê. Labelê kesê ke seba yew xeletîya masume gala ma bikerê, kesê ke nenganê ma biçînê, kesê ke moralê ma bixeripnê, her tim estê û zaf bîyê. Ma înan zî hewaleyê wijdanê înan kenê.

Ma hêvîdar ê ke wendoxê erjayeyî derheqê xebata ma de rexne û pêşnîyazanê xo ma ra vajîy ke ma zî hîna hol xizmetê ziwan û kulturê xo bikerin. Seba ke na xebate hîna xurt û pêt dewam bikero, ma bi her hawayî muhtacê eleqeyê wendoxanê erjayan ê.

Sey vateyê peyênî, Homa bikero ke na xebate heta bi heta dewam bikero û her roje hîna xurt û pêt aver şiro.