Kilama Îmam Hesenî

Seter mabênê Gêxî û Qisleyî de dewêka kan a. Seter goreyê dewanê dorûverî xeylê girs o. Vanê hewt rey bîyo pir hewt rey bîyo tal. Vanê verê, zafa qelebalix bîyo. Vanê, no sere û o sere de ke di dawulî bicenîyêne vengê xo nêşîyêne yewbînan.

Seter de pagî estê, pagê bananê kanan, pagê dêran… Wina aseno ke verê dewa armenîyan bîya. Dima kirmancî (zazayî) tede ca bîyê.

Îmam Hesen, Seter ra lajê Dewrêş Îbrahîmî bîyo. Pîlanê eşîra kurêşan ra bîyo. Maldar bîyo, xurt bîyo, semt bîyo… Terteleyê armenîyan de yew cinîke xo erzena bi bextê înan. Keyeyê Îmam Hesenî de cinîke bena destirma. Ezbeta kalîyan (ê zî kurêsij ê) ra camêrdêk qise erzeno cinîke, aye tacîz keno. Îmam Hesen ey kuweno, şono xanima ey gêno ano. Dest nênano pira, vano ti waya min a, û serbest verdano.

Naye ser o mabênê keyeyê Îmam Hesenî û kalîyan de pêrodayîş dest pêkeno. Îmam Hesen înan ra yewerî kişeno, hewt merdiman zî dirbetin (birîndar) keno. Vanê oyo ke kişîyayo kalikê Kemal Kiliçdarogluyî yo.

Terteleyê 38î de Îmam Hesen duştê dewlete de danê pêro. Kalîyanî zî benê mîlîsê dewlete. Îmam Hesen 38 ra tepîya ko ra nêno war. Ef îlan beno. Nas û dostî ci ra vanê ke wa bişoro Qisle de efûya xo bigêro. Verê qebul nêkeno la badê razî beno.

Wexto ke şono bi Qisle esker ey tepişeno, dest û linganê ey girê dano. Hesê Mamî beno. No kardî gêno, verê çimanê Îmam Hesenî de sane keno. Îmam Hesen zano ke seba ey o. Vano, lawo teres leweyê dişmenî de kardîya mi meance! Hesê Mamî verê kardî nano bêçika ey a îşaretî ya destê rastî ser. Vano, to bi na bêçike çi merdimê ma çi eskerî kiştê! Badê beno a bêçike keyeyê xo de dar de keno.

Hesê Mamî hetê verî ra kardî nano qirrika Îmam Hesenî ser. Îmam Hesen vano, lawo teres kardîya merdimî ver ra nêancîyena, pey ra ancîyena! Hesê Mamî kardî ey qirike ra anceno. Sereyê Îmam Hesenî benê kotî, kes nêzaneno. Vanê meyîtê ey veşnayo.

Wexto ke dest payanê Îmam Hesenî girê danê, erzenê bi tîje ver, maya xo Îmam Hesenî ser na deyîre vana:

“Ax Seter o, Seter o

Natê xo kemer o, dotê xo kemer o

Lajê mi girê do, no bi tîja anmanî ver o”

______

Not: Seter ra Heqîyê lajê Baba Alîyî mi rê na mesela qisey kerde.

__________

* No nuşte "Newepel, Rojnameyo kulturî yo 15 roje, Hûmare 53, Dîyarbekir, Temmuze 2015, r. 6" de weşanîyayo.