Kirdkîya Licê û Kirdkîya Pîranî

Gama ke Ap Husê Keyê Hesan nêweş beno û xestexaneyê Nimûneyî yê Dîyarbekirî de rakewte beno, eynî oda de nêweşêk şarê Pîranî zî rakewte beno.

Ap Hus û pîranijê ma xo rê benê destbirakê yewbînan, benê dostî. Yarîyan kenê, henekî kenê. Seke zaf verî ra embazê yewbînan bê, winî suhbeto weş kenê…

Pîranijî dadîye ra vanê “maye”. Coka camêrdo pîranij gama ke qalê dadîya xo keno, vano, “Maya mi bardinî, ha maya kardinî, ha maya mi wardinî…”

Ap Hus verî fekê ey ra zêde fehm nêkeno. La dima hêdî-hêdî museno, banderê fekê Pîranî beno.

Ap Hus perseno vano:

- Hero şima çî ra vanê “maye”?

Pîranijê ma vano:

- Şima vonî “dadîye”, ma vonî “maye”. Şima vonî “babî” ma vonî “pî”.

Ap Hus vano:

- Nuççç! Şima şaş vanê!

Camêrd vano:

- Qeyî Dat Hus?

Ap Husê ma vano:

- Heyran, madem ke şima dadîye ra vanê “maye”, a game babî ra zî mevajêne “pî”!

Camêrd perseno vano:

- Dat Hus, eyla ma vajî se?

Ap Husê ma vano:

- Vajêne “Nerî!” Mesela, vaje “Nerîyê mi bardo, kardo, wardo!…”

________

Not:  Kirdkîya Licê de çekuya “maye” manaya tirkî “dişi” de, “nerî” zî manaya tirkî “erkek/eril” de ya.