Kitabê Dersê Ziwanî Vejîya

Kitabê Dersê Ziwanî yê ke seraser bi kirdkî (zazakî) yo vejîya. Kitab de bi hawayêko fesîh, akerde û kilmek awanî û sîstemê kirdkî yenê nîşan dayene.

Dersê ke kursanê kirdkî de pratîk de ameyê ceribnayene, nuştoxî seba kitabî hîra û sîstematîze kerdê. Seke yeno zanayene, badê ke êlula 2010î de Komela Ziwan Huner û Kulturî Dîyarbekir de ronîya, sey fealîyetêkê tewr muhîmî yê na komele kursê kirdkî ameyî dest pêkerdiş. Nê kursî hetanî nika hewt rey dîyayî. Kitabê “Dersê Ziwanî” çarçewaya nê kursan de ame meydan.

Nuştox vateyê verênê kitabî de vano: “No kîtab hîna zaf xîtabê ê kesan keno ke wendiş û nuştişê xo esto û bineyke kirdkî zanê la qiseykerdiş, fehmkerdiş, wendiş û nuştişê kirdkî de kêmî yê. Hedefê nê dersan no yo ke kesê wendeyî, kirdkî weş qisey bikerê, asan fehm bikerê, rast biwanê û rast binusê. Metodê nê dersan zî hîna zaf daşinasnayîşê ziwanî yo. Yanî eke merdim ziwanêk baş bişinasno; verê verkan awanîya ziwanî, dima qayde û xususîyetanê ziwanî bişinasno, hem leze xo vîr ra nêkeno hem zî qiseykerdiş, fehmkerdiş, wendiş û nuştiş de zehmetî nêanceno.”

Dersê ke kitab de ca gênê nê yê: 1)Ma Ziwanê Xo Bişinasnîm, 2)Alfabeya Ma, 3)Çekuyî, 4)Şuxulnayîşê Çekuyan, 5)Nameyî, 6)Sifetî, 7)Zemîrî, 8)Zerfî, 9)Edatî, 10)Partîkelî, 11)Bestoxî, 12)Prefîks û Sufîksî 13)Înterjeksîyonî, 14)Hûmarnameyî, 15)Mesderê Karan, 16)Karî-I, 17)Karî-II, 18)Demî, 19)Cumle-I, 20)Cumle-II, 21)Vurîyayîşê Vengan

Çîyo tewr muhîm, gama ke merdim sey komplîkasyonêk hemeyê dersan kitab ra biwano yan zî rêberîya dersdarêk de nê dersan bigîro, a game awanî, sîstem, qayde û heme elementê ziwanî û şuxulnayîşê înan, seke merdim bi hawayêko panoramîk yew şaristanî cor ra, cayêkê berzî ra bişinasno, ziwan sereyê merdimî de zelal beno. Seba ke êdî heme kuçe û kolanê şaristanî hişê merdimî de manenê, merdim o şaristan de vîndî nêbeno û xerîbîye zî nêanceno.

Çi kesê ke bi kirdkî eleqedar benê, bitaybetî kesê ke wazenê wendiş û nuştişê kirdkî bimusê, kesê ke şinê kurs yan zî kursan de sey mamostayî ziwan musnenê, malimê ke do wendegehan de dersa kirdkî (zazakî) bidî, kitab înan rê sey rêberê ziwanî yo.

Adresa Waştişî: rlezgin@hotmail.com

Vaya: 10 TL

Roşan Lezgîn, Dersê Ziwanî, Weşanxaneyê Roşna, Dîyarbekir 2012, 128 rîpelî