Komela Heqanê Merdiman Nameyê Xo Kerd Kurdkî

Şaxa Mêrsînî ya Komela Heqanê Merdiman nameyê bi îngîlîzkî lewheyê xo ra vet û herinde de kurdkî (lehçeya kurmanckî) nuşt.

Serekê şaxa Mêrsînî ya Komela Heqanê Merdiman Elî Tanriverdî derheqê vurnayîşê nameyê komele de va, “Seba ke têkilîyê ma yê mîyanneteweyî estê coka nameyê komele bi tirkî û îngilîzkî nuşte bi. La kesê ke Mêrsîn de muracatê komela ma kenê, zafaneyê înan kurd ê. Kesê ke sey mexdûran muracatê komele kenê ziwanê înanê dayîke kurdkî yo coka ma serê lewheya komela xo ra îngilîzkî wedart û kîşta tirkî de kurdkî nuşt.”

Elî Tanriverdî qiseykerdişê xo de wina dewam kerd: “Qedexeyan ra wetêr ma bi hawayêko fiîlî çîyêko rast û meşrû kerd. Ganî êdî kurdkî her war de bêro şuxulnayene. Ma mucadele kenê ke her kes ziwanê xo yê dayîke de perwerde bivîno. Eke ma nê mucadeleyî kenê, a game ganî ma xo ra bidin dest pêkerdene.”

Elî Tanriverdî qiseykerdişê xo de va, “Sey komele şubeyê ma no war de destpêk o. Ma gurenayîşê kurdkî da dest pêkerdene. Ma wazenê heme rêxistinê cematê sivîlî yê mintiqayanê ke kurdî tede ciwîyênê zî êdî lewhe û amblemanê xo de kurdkî binusê.”