Komela Ziwan, Huner û Kulturî Ronîya

Komela Ziwan, Huner û Kulturî (Ziwan-Kom) ke do seba averberdişê lehçeya kirdkî (zazakî) bixebitîyo Dîyarbekir de ronîya.

Komela Ziwan-Komî ke semtê Yenîşehîrî cadeyê Lîse yê Dîyarbekirî de dest bi fealîyetî kerd, yeno vatene ke do bingeh de seba ziwan, huner û kulturê kurdkî, bitaybetî seba averberdişê lehçeya kidkî û arêdayîş, pawitiş, averberdiş, geşkerdiş, newe ra xuliqnayîşê û zêdnayîşê huner û kulturê na lehçe bişuxulîyo.

Destûrê komele de tayê amancê bînî yê komele zî wina ameyê rêz kerdene: “Komele xo rê kerdo amanc ke mîyanê cematî de fehmêko demokratîko pruler, seypêbîyaye, beşdarbîyayox û rasteqîn ca bigîro û geş bibo. Hewna, xo rê kerdo amanc ke muwazeneya ekolojîke, tebeqeya tebîî ya soyalî û kulturî bêro pawitene û bi hawayêko tendirust dewrê neslê ameyeyî bibo. Komele xebitêna ke her hawa heqê ferdî û grûbî, bitaybetî heqê ke nasname û ziwanê dayîke ra hasil benê bi hawayêko serbest xo îfade bikerê û bêrê tetbîq kerdene. Komele şuxulêna ke fehmê şinasnayîş û wayîrvejîyayîşê ro heqan aver şiro, no ware de rayîrê huqûqî bêrê gurenayîş, hewna, vernî ro her hawayê îhlalkerdişê heqanê merdiman bêro girewtene.”

Endamanê sazkaran yê komele ra nuştox Roşan Lezgînî derheqê ronayîşê komele de wina malumat da bi AKnewsî:

“Xebata ronayîşê komele emser aşma adare ra dest pêkerdbi la walîyîya Dîyarbekirî peynîya aşma temmuze de komele bi hawayêko resmî tesdîq kerde.”

Derheqê fealîyetanê ke do komele bikero de zî Roşan Lezgînî va: “Ma do komelanê klasîkan ra biney cîya bixebitî. Amancê ma yo bngehîn no yo ke, lehçeya kirdkî (zazakî) ke rewşa aye krîtîk a, ma qasê qewetê xo ra bilebitî ke aye bipawin, aver berin û aktuel bikerin. Sey nimûneyî, goreyê îmkananê xo ra, ma şênê na lehçe de çapkerdiş, vilakerdiş û dayîş wendişê kitaban de ardim bikerin. Na lehçede viraştişê fîlman û tertîbkerdişê kayanê tîyatroyî de, hetê madî û manewî ra ma şênê tayê îmkanan peyda bikerin û pêşkêş bikerin. Ma şênê panel, semîner û konferansan organîze bikerin. Ma şênê kurs û atolyeyan akerin û îdare bikerin.”

Roşan Lezgînî qiseykerdişê xo wina dewam kerd: “Komela ma hetê des endamanê sazkaran ra ameye ronayîş û tena do xebatanê ziwanî, hunerî û kulturî bikero. Na merhele de hetê yew komîteya ke hîrê kesan ra pêyena xebata xo dewam kena. Demeyêko nêzdî de ma do seba qeydkerdişê endaman dest bi xebate bikerin. Badê ke komela ma dest bi xebate bikero, amade ya ke çarçewaya amancê xo de heme komele û dezgeyanê bînan reyde her hawa hemkarîye bikero. Tena kurdê ke kirdkî (kirmanckî, zazakî, dimilkî) qisey kenê, amancê xebata ma yê.”