Kovara ŞEWÇILA Vejîya

Kovara edebî hunerî ŞEWÇILA ke Dîyarbekir de amade bena û safî bi kirmanckî (kirdkî, zazakî, dimilkî) weşanîyena, vejîya.

Edîtor û redaktorê kovare Roşan Lezgîn nuşteyê destpêkî de vano “Êdî o wext ameyo ke kirmanckî de kovarê ke tena yew biranş de weşanîyênê vejîyê. Nîyet û amancê ma yo bingehîn o yo ke edebîyat û hunerê kirmanckî (kirdkî, zazakî, dimilkî) de pencerayêka newîye akerîn û kirmanckî gamêna aver biberîn.”

Roşan Lezgîn nuşteyê xo wina dewam keno: “Kovara ma wazena çarçewaya edebîyat û hunerî de weşana xo bikero. Û tena eseranê estetîkan yê sey şîîre, hîkaye, roman, meqale û nuşteyanê derheqê teorîya edebîyat û hunerê modernî de, hewna, roportaj û krîtîkanê (rexne) eseranê edebî û hunerî biweşano.”

Roşan Lezgîn dano zanayene ke înan xo rê kerdo amanc ke nuştoxan û wendoxanê neweyan rê bibê sey wendegehêk û heme heskerdoxanê edebîyatê kirmanckî rê bibê platformêk. Nê derheqî de wina vano: “Ma zanê ke averşîyayîşê edebîyat û hunerî de, perwerdebîyayîşê nuştox û hunermendanê neweyan de, xuliqîyayîşê eseranê estetîkan de, munaqeşekerdişê fikr û teorîya esetetîkî de kovarî her wext sey wendegehî bîyê. Coka ma zî hêvîdar ê ke sey pelêkê tern û tezeyî seba edîb, nuştox, hunermend û heskerdoxanê edebîyat û hunerê kirmanckî nê wareyan de bibîn platformêk.”

Peynî de zî vano: “Hetanî ke destê ma ra bêro ma do layîqê wendoxanê xo bîn. Û ma hêvîdar ê ke wendoxê ma zî bi eseranê xo, bi mektuban, rexne û pêşnîyazanê xo piştgirîya ma bikerîn. Hîna zaf zî, kovare sey kovara xo bizanîn û her hetan ra wayîrîye bikerîn.”

Hûmara yewine ya kovara ŞEWÇILA de 23 nuşteyê cîya-cîyayî estê. Nînan ra yew roportajê ke Roşan Lezgînî şaîr J. Îhsan Esparî reyde kerdo yo. Hîrê nuşteyanê analîzî ra yew nuşteyê Bîlal Zîlanî bi sernameyê “Hetê Şuxulnayîşê Ziwan û Îdyoman ra Hîkaya ‘Beyi Se Bena?’”, yew nuşteyê Roşan Lezgînî bi sernameyê “Kirmanckî de Averşîyayîşê Hunerê Hîkaye” û yew zî nuşteyê Murad Canşadî bi sernameyê “Romananê Mehmed Uzunî de Enstrumanê Muzîkî” yo.

Yew hîkaya Deniz Dilar Pîrejmanijî bi nameyê “Vengo Bêveng”, yew hîkaya Alî Aydin Çîçekî bi nameyê “Jan” û yew zî hîkaya Roşan Lezgînî bi nameyê “Şala Sîyaye” na hûmare de weşanîyayê. Hewna, Alî Aydin Çîçek, Xerîbzeman, Mehmed Elî Sadiq, Hemîd Hozan, Oktay Ersoy û Berxwedar Pîranijî, her yewî ra yew şîîre na hûmare de ca girewto.

Seba têkilî adresanê sewcila@hotmail.com û rlezgin@hotmail.com rê binuse.

Tel: 0 412 223 03 69

Adrese: Lise Cd. 2. Sk. Adalet Apt. No: 3 Yenişehir/Diyarbakır