Kovara Vate Hûmara 31. Vejîya

Hûmara 31. yê kovara Vateyî vejîya. Reya verên a ke kapaxê vernî bi fotograf vejêna. Yew fotografê Sosyolog Îsmaîl Beşîkçî ameyo aliqnayîş.

Na hûmara Vateyî hetê qelîteyê muhtewa ra zaf pêt û dewlemend a. Hetê xebitnayîşê ziwanî ra, hetê averşîyayîş û modernîze bîyayîşê kirmanckî ra çimê merdimî kena pirr. Na hûmare reyde, wina aseno ke hetê ziwanxebitnayena ra êdî vernîya kirmanckî (kurdîya zazakî) weş abîya û êdî sey yew royê zelalî gelîyê xo de herikêna.        

Na hûmare de nuştoxanê kovare ra Roşan Lezgînî zanyaro erjaye Îsmaîl Beşîkçî reyde nasyonalîstîya tirkan ser o yew suhbet kerdo. Na reya verên a ke fikrê Îsmaîl Beşîkçî tadîyênê kirmanckî ser. Sosyolog Îsmaîl Beşîkçî, sey her wextî bi fikrê xo hişê merdimî zelal keno. 

Yew roportajo muhîm zî, serredaktorê kovare M. Malmîsanijî yew kerwa/krîvê ma yo bi nameyê Karmen Ohanyanî reyde ke yew ferdê şarê mexdûrbîyaye/tedadîyayeyî ra yo, kerdo.  

Hewna serredaktorê kovare Malmîsanijî yew nuşte zî derheqê Sadîyê Telheyî de nuşto.

Nuştoxanê kovare ra Munzur Çemî zî derheqê gêrayîşê xo yê paytextê Çînî Pekînî ser o nuşto. Munzur Çem, dergûdila zaf hetan ra behsê rewşa Pekînî keno.

Wisif Hêlinij, Alî Beytaş, Seyîdxan Kurij û Îrfan Kayayî zî her yewî yew hîkaye nuşta.

Yekta H. Okçu fekê dapîra xo ra vîrardişê aye nuştê. Dapîra Yekta bi yew ziwano fesîh cuyê şarê ma yê 50-60 serrî verê cû ra fotografanê erjîyayan nawnena ma.

Yew xebera xeyrêne ya derheqê abîyayîşê Buroyê Vateyî ke Dîyarbekir de abîyo hetê Roşan Lezgînî ra nusîyaya.

Şîîrê ke na hûmare de weşînayîyê ra yew yê şaîrê kurmanckî yo klasîk Sîyahpoşî ya. Na şîîre hetê Malmîsanijî ra tadîyaya kirmanckî ser. Hewna, Mihanî Licokic, W. K. Merdimîn, Remezan Oruç, Oktay Ersoy, Sîyamend Mîrvanî, Huseyîn Burke, Mutlu Firat, Newzat Valêrî, Daîmî Bîngol û Newzat Dodanijî bi şîîranê xo kovare xemilnaya.

Serdar Bedirxanî hewna tayê vateyê verênanê ma arêdayê kovare de dayê weşanayîş. H. Giranî zî yew deyîre arêdaya û kovare de daya weşanayîş. Yew deyîre zî kitabê Necmedîn Buyukkayayî Kalemimden Sayfalar ra ameya neqilkerdiş. Seleh Pakî sey hûmaranê verênan, na hûmare de yew sanike daya weşanayîş.

Rîpelê fiqra û meseleyan zî hetê Mewlud Tanriverdî, Akman Gedîk û Aysena Kurdî ra ameyê xemilnayîş.

Kovara Vate hem hetê qelîteyê muhtewa ra û hem zî hetê averşîyayîşê kirmanckî ra heq kena ke merdim aye teqîb biko û biwano.