LEC Û DENGBÊJ

No beno çend serrî ke mi dir meraqê lecî û qewxeyî peyda biyo. Ez kena nêkena -helbet nêwazena zî- ez nêşena ci ra fek verada. Xwu ra mesele leckerdişê min nîyo, tenya waştişê temaşekerdişê dehwayan o. Mi aşmêk-di aşmî boks temaşe kerd: Lennox Lewis, Mike Tyson, Evander Holyfield, Mihemed Elî Clay, Wladimir Klitschko, Anthony Joshua…

Mi înternet de çi dî çi nêdî heme qedêna. Labelê nê, boks de tenya kulmikî estbî. Nê bawo, ma rê nêbeno!

Lazim o ke zey lejê qicekîya ma bo. Dest, pa, sere, kerra…

Temam, yanî hende zî nê. Labelê gereka tayê serbest bo. Homa pa dayo, gereka lec de o zî bêro şixulnayiş.

Nê qaydeyî ser mi kickboks peyda kerd. Dima mi meraqê xwu da kickboksî ser. Tewr zaf Badr Hari kêfê mi ard. Labelê ez çimê teknolojî biwera! Youtube heto bîn ra alternatîf eşt, la çi alternatîf!

* * *

Nameyê ci MMA bi. Mi va beno ke ey zî zey UFC şîrketêko organîzator bo. Her ke mi temaşe kerd kêfê mi bolêr ard. Dest, pa, arisne-marisne, heme serbestî bî. Xwura manaya ci Hunerê Lecî yê Têmiyanekî, cayê ci zî qefes bî!

Hema vace her maç de leckerî gonî-gonîşir de mendêne…

Haho! Hela qehremananê ci! Fedor Emelianenko, Mirko Cro Cop, Jon Jones, Mark Hunt… Her yew pêlewanek o.

Ez verê kompîturî de ronişena, her roc şeş-hewt maçan temaşe kena. Panc deqayî ez bê MMA nêmanena. Temaşekerdiş hende bi çiyêko normal ke hindî mi pratîkê ci dî! Maç de ewnîyayiş bes bî, vengê ci lazim nêbî. Mi verê maçan kilam yan zî deyîrî akerdêne, dima jî MMA Fight!

Ekran de lec estbî, vergoşê mi de dengbêj. Mesela Khabîb Nurmagomedov dano Conor Mc Gregorî ro, Reşîdê Memçûçanê înan ser Ereba Salih Begî vano…

De bê mehuye!

* * *

Helbet hal bî winî, mi dî dorê mi de bolê merdiman vanê “Meylê ci şîdetî ser o yo.” Yew dişmeno ke aseno, dostan vat “Ma no halê to vînenê, ma to ra tersenê.”

Biterse helbet, teres! Mi heme teknîk-meknîkê ci ezber kerd. Ez eşkena him to bikişa him zî to ser o kilaman vaca…