Merdimê Wayîrê Herî

Xido Qop dewa Xarpêtî Huseynîk de roşeno. Wextê Usmanîyan ra esnafê Xarpêtî kel-mel teber ra ardêne Huseynîk û uca ra pey heron a kiriştêne çarşûya corî. Xido Qop zî yew qifleyê heron xebetneno û pê dabara xwu keno. Rojêk linga serherê ey şikîna, geyreno yew herê cinsî.

Dost û ehbabon ra xebere yena, vonî dewa Pincîrikî de herê cinsî estê. Welhasil Xido Qop şino Pincîrik ra yew hero cisne gêno û gureyê xwu dewom keno. Çend aşmî ra pey Xarpêt ra yeno keye, eke keye biyo pirî merdimi. Kulfetê xwu ra vono:

- Xonim, inî kom ê?

Cenîke vona:

- Wilayî ez inê şexson nîşinasneno.

Xido Qop agêreno hal û xatirê yîn perseno vono:

- Şima kom ê?

Misafirî vonî:

- Ma Pincîrik ra yê. To dewa ma de yew her girewtbî. Ma eqrebayê wayerê ay herî yê. Ma emşo mêmanê to yê, siba şonî Xarpêt.

Xido Qop, aynon rê îzet îkram keno. Beno nimajê, misafirî acor qayme şinê Xarpêt.

Yew deme ra pey Xido Qop hewna yeno keye ke çi veyno! Eke keye biyo pirrî mêmanî. Cenîke ra vono:

- Lîya inê kom ê?

Cenîke vona:

- Mêrik, wilay ez çewekî nas nêkeno!

Xido Qop hewna selam dono û perseno vono:

- Qusur mewnîn la mi şima nas nikerdî?

Misafirî vonê:

- Ma Pincîrik ra yê. To par dewa ma ra yew her erînaybi. Ma eqrebayê wayerê ay herî yê. Ma emşo îtya benê mêman û siba şonê Xarpêt.

Xido Qop keye de çina ke esto se misafiron rê îkram keno. La peynîya misafiron nîna.

Rojêk cenîya xwu ra vono:

- Gonî ma qehr û qotikê inê herî ra bixelisî. Lîya ez Çor Paşa nîyo! Willay merdimanê inê herî keyê ma xeripnenê, ma nûnî rê muhtac kenê.

Xido Qop lezabez herî beno roşeno.

Yew deme ra pey, hewna yew qifleyê merdimon yenê keyê Xidê Qopî. Xido Qop cor de Xarpêt ra yeno ke çi veyno! Eke keye ha pirrî merdimî. Vono:

- Şima kom ê? Mi şima nas nîkerdî? Hema qala xwu nêqedîneno, misafiron ra yew vono:

- Ma Pincîrik ra yê.

Xido Qop qala ey birneno vono:

- Willay mi her rot!

Misafirî vonî:

- Qey? O her cinsî bi!

Xido Qop vono:

- Homa herî ra razî bo, willay cawo cins ra bi, la misafirê ey zafî bî.