Merg û Veyveke

Na deyîra cuyî ya, vayî rê ameya vatiş.

Na herra sîya ya, bi mergî ameya awdayîş.

No eşq o, hesirê çiman ra ameyo pewtiş.

Peyê koyan de, çiman ra dûrî şewî qedînê, rojî bar kenê. Merg dormeyê dinyaya qefelîyayîye de gêreno. Destanê xo nano çinayî ra gan tede nêverdano. Keno huşk û qedêneno. Şilî vindena, deryayî heredînê, vewra sîyaye varena. Duştê mergî de keder gineno eşqan ro. O seba vêşanîya ruhê xo ruhan arê dano. Ruhê camêrdanê çêran gêno, ruhê cinîyanê rindekan gêno, ruhê domananê bêguneyan gêno, sêneyê merdimîye ra ruhê merdimîye gêno. Merg westayê karê xo yo. Gan dejneno, keyan vêşneno. Mergî ra pey adir gineno keyan ro, dû heredîno lozinan ra. Û meyîtî manenê. Dormeyê meyîtan de bermayîş û sixletîye manena.

Veyveke sey asmênê kewî ya. Rîyê veyveke şewlê estareyan de bîyo wareyê aşme. Roştîye rîyê veyveke de beden der a. Veyveke vengê şewdirî ya Veyveke mîlçika bêperr a. Veyveke vila bêherr a. La nika tenge der a. Ruhî ver der a. Merg qet xo vîr ra nêkeno, lez êno silayîye. Huyayîşê şewdirî ci ra gêno û bermayîşê şewe keno virarîya roştîya aye. Heqîbeyê mergî de ef çin o. Dejayîş çin o... Vanê “Heqî sêneyê mergî ra zerrîya ey veta û yew kerra dekerda sênêye ey.”

Merg o no, tena gêreno şewan de.Cu yo no, tena maneno duştê

mergî de.

Û merg hêdî-hêdî rîyê veyveke de gêreno. Destê mergî serdin ê. Helmê mergî pukê gucige ra dîyarî yo. Veyveke ortê kila cehenemî de, serd de çin a. Çimanê xo yê sey estareyanê bêasmenî akena û mergî vînena duştê xo de. Bişerm vengê xo yo barî ra deyîra cuyî vana. Vengê cuyî kena berz. Merdimîye deyîra aye goş dana. Deyîra veyveke de adirî vêşenê, wela vêşayîye şîware vana. Deyîra veyveke de domanî hewnan de lorîkan goş danê. Vengê aye de zimistanê bêwisarî bermenê.

Deyîra cuyî ya na, vengê xo bide mi.

Govenda wareyê ma ya na, destê xo bide mi.

Û merg goş dano nê vengê asîyî. Heta no wext tu kesî duştê ey de sereyê xo berz nêkerdo. Neke deyîre vatene... Merg bêçare maneno. Birînanê bêdermanan gêno. Kila eşqî ginena sêneyê eyê talî ro. Deyîra veyveke sey awe leşa mergî de geyrena. Seke wisaran koyan ra awa vewre herekîna wina herekîna damaranê ey de. Şimşêrî ginenê zerrîya mergî ro. Asmênê mergî de hewrê şilîye fetilînê.

Veyveke sey çilaya şewdirî hêdî-hêdî şona we. Cuyî ra vişîna. Cu kî rindekîya aye ra… Merdimîye wextan de sey yew helmî vîyarena ra û şona la deyîra veyveke manena. Deyîra veyveke fekê domananê şewe de manena.

Çimanê mergî de nêmanena û rişîna sêneyê erdî. Bena zergun…*

__________

* No nuşte “Newepel, Rojnameyo kulturî yo 15 roje, Hûmare 30, Dîyarbekir, 01-15 hezîrane 2012, r. 6” de weşanîyayo.