Meselaya Ap Mehmûdî

Eno vîdeo roja 08.09.2016 de hetê Aydin Ateşî ra ancîyayo. Keso ke qisey keno, dewa Qisleyî Xosim ra Mehmûd Güngör o. 

Aydin Ateş Ap Mehmûdî ra wazeno ke meselaya xwu û heran qisey bikero. Ap Mehmûd Uşê Nermî qest keno vano:

- Dano mi ro ha!

Aydin vano:

- Nê nê, hema qe.

Ap Mehmûd vano:

- Welle îşê dey belî nêbeno!

Aydin vano:

- Nê nê. Haydê haydê.

Ap Mehmûd vano:

- Hema na îşe ke bibo, sebev ti ya.

Aydin vano:

- Hay hay, başım üstüne. Haydê.

Û Ap Mehmûd dest pê keno, meselaya xwu qisey keno, vano:

-Min û na bela. Herê Rizay biyo qeda, sawune ma!

Her, vergî werdo. Riz ame ser de berva.

Her berva Riz berva, her berva Riz berva.

Mi her vindarna, Riz nêvindarna.

Herî dergaderg Rizî de niyada. Va ke “Haqa to de şîkayetçî yo. To zof no ro mi baro giran. Nika ke şiyo a dîna, gerrê to ken. To rê zof yena ceza.”

Alî Gungor kewrayê xwu bî. Tenê jîva, tenê kî binê lewo ra huya. Rizî va ke “Kewra mehuye, kiwar nono poto yo, rozê kî yena virênîya sima.”

Hera Bertalî ama hera Alî dawete kerda, vana “Xinamî me, bê şîme dewa ma. Îvrahîmê Boluca xozan de yonca ramita, biya dêy ra. Mi ve to ra ramenîme dem û dewran.”

Bertal sipêde ra wusto ra ke qinestê here pey ra vergî qilayno ra, linge kota de. Vergî werda hera xinamîyê ma.

Mi va ez biyo sa, herî bitûn, vergo werdî, xozanê heron herê mi rê mendê teyna.

Payiz na o, ame, sujî qoronê mi der o, son kolî an, zumistonî verê xwu de bol-bol nan ta.

Mi herê xwu verê çêverî de girêda.

Pesewe kutikî loway. Domono va ke “Bao raurze, xozî kotê bostonê ma.” Qorê mi dezênê, mi xwu ra nêdî, nêwusta ra.

Sipêde ra wusta ra ke, vergî qinestê herê mi pey ra qilayno ra!

Herî dergaderg mi de niyada, va ke “Des û ponc serrî mi to rê barî ardî, to rê can da.” Herî va ke “Vergî mi rê îşkence kerdo, ti nika hona wustê ra!”

Mi va “Hero qisûr de niyamede, qornê mi dezêne, mi xwu ra nêdî, nêwusta ra.”

Ma ve wayirê hero ameyme pêser, jîvayme. Mi va “Birayên, mejîvyê, Azgilêr de hera Uşê Nermî, Korte de herê Rizî pê menda. Texmîn ken ke tenê kurrikêde danê ma.” Va “Kurrikê hera Uşê Nermî mi rê towbe bo!”

A serre mi mal berdiv mezra. Uşî kemerê kuye mi ra, binê gosê mi ra vêrde ra, satê nêmendvî mezgê mi kerdê vila!

Nayê rêçe kote, tozê xwu rîte, rew-rew sono qawa, a uzay sere vî.