MHME Dewaya Hrant Dînkî de Tirkîya Mehkum Kerde

Mehkemeya Heqanê Merdiman a Ewropa (MHME) dewaya ke merdimanê Hrant Dînkî akerdbî de Tirkîya sucdar dîye û bi dayîşê 133 hezarî awro mehkum kerde. Tirkîya do nê pereyî ra 100 hezar awro seba cinî û domananê Hrant Dînkî, 5 hezarî awro seba birayê Hrantî Xosrof Dînkî û seba mesrefê mehkeme zî 28 hezarî 595 awroyî bido.

MHME panc muracatê cîya-cîyayî ke wextanê cîya-cîyayan de hetê merdimanê Hrant Dînkî ra virazîyabîy dewa de heme pêresnay û qerar da. Qerarê xo de da zanayene ke, madeyanê Peymana Heqanê Merdiman ya Ewropa ra madeya 2. ke derbarê heqê cuye de ya hem hetê esasî ra hem zî hetê ûsulî ra îhlal bîya, madeya 10. ke derbarê azadîya îfadeyî de ya îhlal bîya û madeya 13. ke heqê muracatî tenzîm kena zî îhlal bîya û bi no qayde Tirkîya mehkum kerde.

Muracatê merdimanê Hrant Dînkî de îfade beno ke “dewlete derbarê pawitişê heqê cuya Hrant Dînkî de mesulîyetê xo nêardo ca û bi qaso ke îcab keno kerdoxanê hêrîşî tehqîq nêkerdê”. Hewna, verê cû zî gama ke “Hrant Dînk Tirkîya de ame mehkeme kerdene û mehkum bi, dewlete bi nê qerarî o kerd hedefê nasyonalîstanê tirkan.”

Badê ke Tirkîya hetê MHME ra mehkum bîye, qerar da ke do eleyhê qerarî de muracatê Daîreyê Berzî nêkero. Yanî, qeraro ke dîyayo do qebul bikero.

Derheqê qerarê mehkema de wezaretê karê teberî yê Tirkîya yew beyanat vila kerd ke tede îfadeyê “seba ke qerarê mehkeme tetbîq bibo xebatê ke îcab kenê do bêrê kerdene û seba ke îstîqbal de îhlalê winasî tekrar nêbê zî do her tewir tetbîrî bêrê girewtene.”

Cinîya Hrant Dînkî Rakel Dînk derheqê qerarî de rojnameyê Agosî de bi vengêko bermin yew beyanat da çapemenîye û va, “Qeraro ke MHME dayo, seba Hrantî yew dîyarîya sergêra ameyîşê dinya ya. Eke weş bîyêne mehqeq nê qerarî ra zaf zerrweş bîyêne.” Rakel Dînk, dima da zanayene ke do hemeyê tezmînatî mîyanê hîrê dezgeyanê însanî yê armenîyan de bêro bexş kerdene.

Rakel Dînk peynîya beyanatê xo de va, “Dewleta Tirkîya hetanî ewro tu wezîfeyo ke kewno milanê aye ser nêard ca. Ez hêvîdar a ke ewro ra pey fek helwêsta xo ya ke sucdarî pank û bêsucî mehkum vejena ra verado û sey dewletêk ke xo layîqê wijdanê şarî vînena gaman bierzo.”

Seke yeno zanayene rojnameger û nuştoxo armenî Hrant Dînk bi heqaretkerdişê ro tirkîtîye amebi sucdar kerdene û roja 19.01.2007 de Îstanbul de bi suîqestêk amebi kiştene.