MI ÇIYÊK NÊVAT

Mi barê xwu nêdabi bagaj ke ez lez hereket bikerî, berey nêmanî. Senî ke teyare resa erd, mi çenteyo des kîlo eşt milê xwu, goş nêda raywananê ke giran-giran wurzenê, ez miyanê qoltuxan de zey şiwaneyê ke koyan de mûsayo zinar û latan û geman miyan de bêxem meşiyaya aver şiya. Verê keyberî de mi bi sereyê xwu silam da host û hostesanê hîper-kubaran û ez veciyaya teber. Tabî, mi heme çî hesab kerdbi: teberê teyareyî zereyê termînalî bî. Korîdoranê dergan ra dima keybero verîn, dima keybero diyin û peynîya peynî de oksîjen! Eke ez rew bivecî beno ke otobusêk bivînî û bê mesrefê taksîyan şirî merkez.

Heme çî zey texmînê mi bi: Saete diwês ra çar-panc deqayî mendbî û verê firokxaneyî de otobusêk estbî. Ez rew şiya, mi heqê ci da şofêrî û qoltuxanê verînan de cayêko weş dî. Mi va her hal ma do saete des û didi de bivecî, la winî nêbi. Şofêrî pawit û pawit, nîmeyê raywananê ke ez înan ra viyartbia yew bi yew ameyî weniştî otobuse. Hella hella!...

Saete bî diwês û nîm, şofêrî kontak tada. Mi zereyê xwu de vat boka hewnê mi nêro. Eke ez rakewo heta otogar ez do bibî zey nêweşanê parkînsonî. Halêko winî de ez nêşena cuzdan û çenteyê xwu mihafeze bikerî. Xwura her roce xeberan de vacîyeno, enê bajaranê girdan de seba vîst lîrayî sereyê merdimî yeno birnayiş. Mi ewnîya ke telefon de şarj nêmendo, ez nêşena bikewî înternet. Rayir zî tarî bî, çi nêaseyne. Mi ewnîya raywananê ke suhbet kerdêne ra.

Çepraştê mi de di tenê extîyarî estbî. Înan ra mêrdekî vengê xwu nêkerdêne la pîre hendayê her diyan û raywananê bînan ke rakewtbî qisey kerdêne: "O wext ez des û heşt serre biya. Ez şiya Ewropa, mi va tiya de çiyêk çin o. Ez Swîsre de biya, mi Luciano şinasna. Yanî verê verkan ey ez dîya, keyfê ci mi rê ame. Xwura o wext ez zaf şerminik biya. Zerrîya Lucianoyî kewta ino halê mi..."

Mi ewnîya ke otobuse otogar ver dekewta Yewîya Ewropa! Verê pîra fekpîle de yew pîra bîne estbî ke aye zî bi meraq xwu çarnabî, bi "himmm, maşella, zaf weş, wax wax”an vokal kerdêne. Hal û qiseykerdişê înan weşê mi şi, mi goşê xwu da înan ser:

-Dima keyneka ma bî.

-Maşella...

-Nika zewicyaye ya.

-Eferim...

-Zamayê ma Hollandayij o.

-Ox, maşella...

-La gencê nikayî tut nêanê, vanê ma do çend serrî biewnîyê rehetîya xwu ra, ma do temamê dinya bigeyrê, dima bêre ronişê.

-Wax wax...

-Belkî o wext tut biyarê. O zî tewr zaf yew...

-Heyf...

-Wa zey Kurdan zî nêkerê, o çi yo her cinî davîst domanan ana... Dima nêşenê bikerê weye, tutî perîşan benê...

-E wulay...

Mi dî ke mesela ameye ma ser, xwura ma Yewîya Ewropa de zî bî, qey demokrasî û azadî ez nêtersaya, mi hema midaxele kerd:

-Davîst tenê çî xala mi, ez zî Kurd a, la çiyêko winî çin o.

-Senî çin o lacê mi, ma her roce fîlman de vînenê…

-Fîlmî raşt nêvanê, zûrî kenê...

-Heme televîzyonan de eynî çi estê, zûrê çi! Şima çend tenî yê?

-Hewt...

-May û pîyê to tay ardê. Kurdanê bînan her ca pirr kerdo... Ma dîzîyan de zî vînenê lacê mi, her ban de hîris merdimî cuyenê. Belkî zî ti raşt nêvanê, kam zano keye de çend way û birayê to estê... Xwura zilm û tehdaya ke şima keynan rê kenê zî ecêb o. Nêerşawenê mekteb, wendiş û mûsayiş çin o... Ma winî nîyê, hela Ewropayijî qet winî nîyê...

Ma Yewîya Ewropa ra vecîyaybî...

Mi dî ke vokalîst û raywanê bînî zî bi awiranê xwu destek danê aye, pêro hazir ê ke ezberê xwu tekrar bikerê la mi caverda, çiyêk nêvat...