MI FEHM KERD

Behr ra ameybî

Bêkes bî

Ez bêkese bîya

Tenayîya ma bêkese bîye

Gina qeraxê mi ro

Pêl da zerrîya mi de

Tar û mar bî hêşê mi

Tar û mar bîya ez

Tef û duman vet sêneyê mi de

Çiman de keweyê behrî

Lewan de boya kewze bîye

Bi awiranê maseyan kewt cila mi

Bi awiranê hîtan...

Kewt ruhê mi

Vayî deyîrê qedexeyî vatî ma rê

Asmên ma rê bî lihêf

Behr ma rê bî doşek

Erd seba ma rut mend

Rut mend behr

Eşq kiştox bî

Eşq celadê ma bî

Ma vileyê xo kerd çewt duştê ey de

Ma merdîme yewbîn de

Leşa mi de azney kerd

Mi behr şimit areqê ey ra

Jîvayîşê ma gina bêvengîye ro

Mi zana ke ez bîya behr

Mi zana ke ez bîya kewe

La heskerdiş behrbîyayîş nêbî

Heskerdiş zerrî de tena bîyayîşê yew dilopa bî

Mi dima fehm kerd

Mi dima fehm kerd...