Musabeqeya Fiqrayanê Kirmanckî (Zazakî)

Keyepelê kirmanckî (kirdkî, zazakî, dimilkî) Zazakî.NET (www.zazaki.net) musabeqaya fiqrayan a bi xelate organîze keno.

Seba fiqraya yewine 250 TL, seba a dîyine 150 TL, seba a hîrêyine 100 TL, seba fiqrayanê çar û pancine zî her yewe rê 50 TL xelata madî û seba fiqrayanê şeş ra hetanî desine zî xelatê mansîyonî dîyîyenê.

Amancê Musabeqa

Semedo ke kurdkî (kirmanckî, kurmanckî) qedexe bîya û perwerde pê nêbîyo, semedo ke şarê ma bîyo hedefê polîtîkayanê asîmîlasyonî, coka wendiş û nuştişê ziwanê xo ra bêpahr mendo. Ziwano ke pê nênusîyo, nêbo ziwanê wendiş û nuştişî, nêşêno bimano. Roje bi roje mîyanê cuya şarî ra wedarîyeno, vindî beno şino. Bi nê fikrî, ma wazenê bi tayê aktîvîteyan mîyanê şarê xo de kulturê wendiş û nuştişê kirmanckî (zazakî) aver biberin. Bi organîzekerdişê na musabeqe bineyke bo zî ma wazenê xizmetê nê amancî bikerin.

Sedemo ke fiqrayî kilmek ê, asan nusîyenê û hema vajêne ke her merdim tewr tay fiqrayêk-di fiqrayan zano, şêno bi asanî çend fiqrayan binuso, coka ma sere de bi musabeqaya fiqrayan dest pêkenê. Musabeqaya fiqrayan ra pey, na rey, ma do yew babeta edebîyatî de; meqale, hîkaye, şîîr yan sewbîna babete de prosesê nê musabeqeyan dewam bikin. 

Şertê Musabeqa

Ziwanê fiqrayan tena kirmanckî (kirdkî, zazakî, dimilkî) yo. Cinî-camêrd, hewt ra hetanî hewtay, her merdim şêno beşdar bibo. Ededê fiqarayan zî sînorkerde nîyo. Yew merdim şêno bi 1 fiqra zî beşdar bibo, şêno bi 10 yan 20 fiqrayan zî beşdar bibo. La tena yew fiqraya beşdarbîyayoxêk kewna derece. Heme fiqrayî, badê musabeqa do bîyerê komkerdiş û yew kitab de biweşanîyê. Coka, şarê ma, her kes çend beşdar bibo, çend zêde fiqrayan bişawo, seba edebîyat û kulturê ma benê dewlemendîye.  

Xelatî tena seba 10 fiqrayanê verênan dîyenê

-Seba a yewnine 250 TL

-Seba a dîyine 150 TL                            

-Seba a hîrêyine 100 TL

-Seba fiqrayanê çar û pancine her yewe rê 50 TL

-Seba fiqrayanê şeş ra hetanî desine zî xelatê mansîyonî dîyîyenê. 

Şertê Beşdarbîyayîşî

-Fiqrayî ganî bi alfabeya latînkî ya kurdkî binusîyê.

-Ganî goreyê rastnuştişê kirmanckî (zazakî) ra binusîyê.

-Fiqrayî, ganî komputere de, sey dosyaya wordî binusîyê û bi postaya elektronîke bişawîyê adresa zazakinet@hotmail.com rê.

-Eke beşdarbîyayox bi nameyêko mustear binuso zî, hewna, ganî nameyê xo yê resmî û seba têkilîye numreyê telefonê xo bido zanayîş. Bê destûrê beşdarbîyayoxî, nameyo resmî eşkera nêbeno. 

Derecedayîşê fiqrayan

-Alfabeya kurdkî rast ameya şuxulnayîş?

-Qaydeyê rastnuştişî tetbîq bîyê? Yanî, goreyê qaydeyanê kirmanckî nusîyaya?

-Fiqra çiqas aîdê cu û kulturê kurdan a? Yanî, çiqas reng û boya kulturê cematê ma fiqra de esto?

-Hetê estetîk û zerafetê pêşkêşkerdişê mesela ra, hetê uslûbê qalkerdişî ra, kalîteyê fiqra kam derece de yo?

-Taybetîyê fiqrabîyayîşî, yanî, mîzeh çiqas tede esto?

(Fiqrayê ke ziwananê bînan ra tercume bîyê, yê ke verê cû cayêk de weşanîyayê û yê ke teberê exlaqê umûmî de bê, qebul nêbenê.) 

Netîce û Dayîşê Xelatan

Roja tewr peyêne yê beşdarbîyayîşê musabeqa 01 adare 2010 o. Roja 15 adare 2010 netîce îlan beno. Badê ke netîceyê derecekerdişê fiqrayan temam bi û Zazakî.NET (www.zazaki.net) de weşanîya, tewr erey mîyanê hewteyêk de, yan dest ra yan zî bi rayîrê posta û banka, xelatî bîzat hetê sponsoran ra teslîmê xelatgirewtoxan benê. Sponsorê na musabeqe, di tene welatîyê ma yê kurdperwer ê.

Bi rêzdarî îlan bena.