Musabeqeya Hîkayan yê Abdullah Duranî

Netîceyê musabeqeya hîkayan yê Abdullah Duranî yê hîrêyine ke hetê sendîqaya maliman (Egitim-Sen) yê Dîyarbekirî ra organîze bena, bellî bîy.

Musabeqe de qismê kurmanckî de hîkaya bi nameyê “Mêvan” yê Ayşe Dertli bîye yê yewine. Hîkaya bi nameyê “Dewsa Ramûsanên Te” yê Ahmed Ronîarî bîye yê diyine. Hîkaya bi nameyê “Qêrîna Jiyanê” yê Qasim Karataşî bîye yê hîrêyine. Alî Koç, Şêxo Filît û Çîgdem Baran zî xelatê mansîyonî girewtîy.

Qismê kirmanckî (zazakî) de tena hîkaya Alî Aydin Çîçekî estbî, aye zî xelata mansîyonî girewte.

Qismê tirkî de Mehemed Şaman bi hîkaya xo “Uç Kelime” xelata yewine, Kemal Varolî bi hîkaya xo “Kardeş Savaşı” xelata diyine, Alîşêr Avci zî bi hîkaya xo “Çikmaz” xelata hîrêyine girewte. Eylem Ata Guleç, Kubra Aksoy û Samî Ozdilî zî xelatê mansîyonî girewtîy.

Serra 2006 de, Dîyarbekir de roja 28 adare ra hetanî 1 nîsane aktîvîteyê protestokerdişê kerdenanê dewleta Tirkîya virazîyabîy û mîyanê şarî û hêzanê dewlete de pêrodayîş vejîyabi. Nê bîyenan de domanî zî tede da-des merdimî kişîyabîy û bi seyan merdimî birîndar bibîy, bi hezaran merdimî zî tepişîyabîy. Abdullah Duran zî 9 serrîya xo de, netîceyê teqnayîşê çekanê hêzanê dewlete de o wext Dîyarbekir de kişîyabi.

Sendîqaya maliman yê Dîyarbekirî seba xatirê domanê ke o wext kişîyabîy, birîndar bibîy û tepişîyabîy, bî hîrê serrî ke musabeqaya hîkayan organîze kena. Emdamê komîteya îdareyê sendîqaya maliman yê Dîyarbekirî ra Yusuf Kardaşî da zanayîş ke, ma na musabeqa seba yadkerdişê domananê ke o wext cuya xo vindî kerdbi organîze kenê. Û va, hetanî ke ziwanê aştî û biratîye serdest nêbo, ma do hertim na aktîvîte organîze bikerin.