Mutasyon

"...DNA ra dima meselaya mutasyonî zî esta. Îmtîhanan de her serre nînan ra persî yenê persayiş, lazim o şima goşê xwu weş bidê mi. Mutasyon xeripnayişê şeklê genan o, fişarî ver bedilîyayişê genetîkî yo. Eno semed ra zî radyasyon, madeyê kîmyewî û çiyê zey nînan ê. Tesîrê ci xeylî serrî dewam keno. Zaf nêweşî mutasyonî ver vecîyenê..."

Teq teq!

Keyber abi. Lacekêk kewt zere, wendekar bi la hendayê mi derg bi... Bi Tirkîyêka xirabe vat "Filan mamosta tiya der a?"

Orteyê derse de keweno sinif, dersa mi herimneno la çiyo ke perseno zî "filan mamoste tiya der a?" Ez zaf aciz biya la fina zî mi hêrsê xwu nimit. Mi zereyê xwu de vat "Şo, verî Tirkî bimûse. Bi eno qiseykerdişê xwu ti nêşenê mekteb biwanê."

-Nê, tiya nîya. Ti kamcin sinif der ê?

- 8-D.

-Temam.

Çirt.

Derse senî dewam kerd ez nêzana la dima lacek mi vîr ra nêşi. Ameyo sinifa heştin la nêşeno weş Tirkî qisey bikero. Xwura bellî yo ke tûtê ma kurdan o. Mi ci rê çiyêko xirab nêvat, zerrîyê ci nêşikite la fina zî ez ey ver kewta: "Eno lacek do senî Tirkî bimûso, senî dekewo îmtihanê lîse, do senîn lîse biqedêno û unîversîte biwano... Mimkûn nîyo. Herhal do zey zafê domananê ma bibo şofêr yan zî esnaf... Înan ra tepîya ancax kar û gureyanê bê dîploma bikero..."

Çend rocî dima ez trafîkê şanî ra rincan biya, bi erebaya xwu kewta kuçeyêko tenge, mi va ez tiya ra şena şira dekewa raya bîne ser. Mi weş dîqet nêkerd ke kuçe hetêk ra akerde yo yan di hetan ra. Ez des metreyî şiya nêşiya, mi dî heto bîn ra dolmîşêk “dut dut” ameye kewte fekê mi ver. Bajaranê girdan de xezebê şofêranê taksî û dolmîşan ver her kes îlellah keno. Mi ewnîya eke ez ageyrî, ez do dekewî trafîkê cadeyî miyan ke, o zî zîndan o. La eke dolmîşe xwu bido miyanê erebeyanê kem kuçe de park kerdo, ez do rehet dewam bikerî, o zî do zehmetî nêanco. Bi tersnayişêk ke ez bellî nêkena mi îşaret kerd ke rayir bido mi la xemê ci nêbî. Mi zerrîyê xwu de hesab kerd: "Eno trafîk de zî mêrdek eşkeno heydero xwu bigêro bêro cêr. Ez zaf zerrîtenik a, hewteyêk nêşena xwu tesîrê ci ra bixelesnî..."

Ez miyanê hesaban de biya, mi dî laceko ke dersa mi herimnaybî ame kewt miyanê ma. Winî bêters şofêrê dolmîşe re vat "Ti nêvînenê cade de trafîk senîn o! Xwu bide hetêk, wa xoce şiro."

Mi fam nêkerd mêrdek senî razî bi, zey vatişê ey kerd...