Înadê AP Husî

Serrêk Ap Husê Keyê Hesan, birayê xo El û Kejo pîya xo rê kelceyan kenê weye.

Miqatkerdişê kelceyan kenê dore. Her kes bi dore celeyê kelceyan beno ko ra çerêneno û ano.

Axir payîzo peyên êdî kelceyî heme benê xurt û qelew, goşt gênê. Ganî kelceyanê xo biberê Licê de biroşê.

Dewe ra hetanî Licê bi rayşîyayîşê celeyî qasê hîrê saetan rayîr esto. Her hîrê birayî şan de şêwrê xo kenê. Ap Hus vano, gama ke ma celeyî biberîn Licê, ancî ma sey verî bi dore ramenê. Xo rê rayîr bare kenê, vanê, ma her yew tam yew saete celeyê kelceyan ramenê. Wina pêkenê.

Şefeqêk werzenê celeyê kelceyan danê vernîya xo û verê xo danê Licê. Saeta verêne Kejo rameno. Dima El saetêk rameno. Elî dima zî Ap Hus tam saetêk celeyî rameno.

Hîrê saetê înan debenê la hema newe resayê verê Baxçeyê Xanime. Tewr tay nêm saete rayîr mendo ke biresê Licê. Ap Hus vano, saeta mi temam a, ez êdî nêramena. El vano, wilay mi zî tam saetêk ramitî, ez nêramena. Kejo vano, mi rê çi, mi dora xo vîyarnaya.

Her hîrê zî înad kenê, yewbînan ra heredîyenê. Her yew verê xo dano hetêk ser şino.

Kelceyî bêwayîr manenê, ê zî xo rê her yew hetêk ser benê vila şinê.