Newepel-38 Vejîya

Hûmara 38. ya Newepelî vejîya.

Na hûmare de nuşteyê edîtorî de behsê polîtîkaya dewlete derheqê kurdkî, bitaybetî zî derheqê perwerdeyê kurdkî de beno. Nuşte de wina yeno vatiş: “Seba ke vera şarê dinya de bineyke ryê xo sipî bikero, seba ke kurdan tikêk nerm bikero, nê serranê peyênan de rayîr akerd ke tayê unîversîteyan de qismê kurdkî abo, sey dersa weçinîta kurdkî wendegehan de bêro musnayîş. Teorî de nê gamî eştî la pratîk de hetanî ke dest ra yeno nê gaman pûç kena, nêverdana pratîze bibê. Û xora kurdî zî -Homa esto- seba ke nê firsendî ra îstîfade nêkerê, her çî kenê! Mesela, tena Dîyarbekir de 405 wendekaran dersa Quranî tercîh kerda. La temamê

Tirkîya de 21 hezarî wendekaran dersa kurdkî tercîh kerda. Vîst mîlyonan ra vêşêr kurdî estê, hezar ra yew ziwanê xo tercîh keno!

(…)

Tîya de çîyo ke nêno fehmkerdiş no yo. Sîyasetê kurdan meselaya ziwanê kurdkî de rolê hîrê meymunan de yo: Ne dîyo ne eşnawito ne zano! Seba ke neslê ma yê neweyî roje bi roje ziwanê xo ra dûr kewenê, coka sîyasetê kurdan çend serrî dima do vajo ‘Na rastîyêka sosoyolojîk a, êdî her kes tirkî qisey keno.’ Ez bawer nêkena kes do werzo vajo, na ‘rewşa sosyolojîke’ bi îhmalê kamî ameye meydan?”

Roportajê na hûmare şaîr û hîkayenuştox Alî Aydin Çîçekî hunermendê tîyatroyî Tekîn Agacikî reyde kerdo. Hunermend Tekîn Agacik derheqê serebutan û rewşa xo ya hunerî de gelek melumatanê muhîman dano.   

Nuştoxê neweyî yê na hûmare Şihab Zinar û Ednan Çelîk ê. Nê her di embazî reya verêne Newepel de nuşteyê xo weşanenê. Şihab Zinar Qowancîyan (Kovancılar) ra, Ednan zî Pasûr (Kulp) ra yo.

N. Celalî fîlmê rejîsor Nûrî Ceylan Bîlgeyî “Zemanêk Anadolu de” nalîz kerdo. Yaşar Balukenî yew hîkaye nuşta. Şeyda Asmîn nuşteyêko estetîkî nuşto. Rohelat Aktulumî bawerîyanê şarî ra gelek çî arê dayê û dayê weşanayîş. Yew deyîra govenda çepkî yê Hesen Alkişî û yew zî şîîra Laser Wesar Valerî weşanîyaya. Nînan ra teber kayanê ma ra “Mîrçikfir”, gelek xeberê muhîmî, nameyê nebatan û xaçepers esto.

Newepel biwanîn, bidîn wendiş. Şima eşkenê her cayê dinya ra bibîn aboneyê Newepelî.

Seba têkilî newepel@hotmail.com rlezgin@hotmail.com rê binusîn.