Nuşteyê Edîtorî yê Rojnameyê Newepelî-1

Wendoxê erjaye û delalî!

Şima zî zanê, her destpêk heyecanêko newe yo. No serê wisarî, menga adare ya pîroze de, ma bi nîyetêko pak û bi heyecanêko teze şima ra vanê merheba!...

Na reya verên a ke welat de rojnameyêk safî bi kirmanckî (kirdkî, zazakî, dimilkî) vejîyeno.

Rojnameyê ma NEWEPEL, çarçewaya xebata Komela Ziwan, Huner û Kulturî ZIWAN-KOMî de vejîyeno û rojnameyêko kulturî yo. Komela ZIWAN-KOMî par aşma êlule de hetê çend kurdperweran ra Diyarbekir de ameybî ronayene. Na komele xwu rê kerdo hedef ke kirmanckî aktuel bikero, aver bibero, geş bikero.

Senî ke her kes miletê xwu ra hes keno, ma zî miletê xwu ra hes kenê. Ma rê miletê kurdî muhîm o, ma kurdperwer ê. Seba ke kurdî sey milet, sey netewe aver şirê, seba ke ziwan, edebîyat, huner û kulturê kurdan aver şiro û geş bibo, çi destê ma ra bêro, ma texsîr nêkenê.

Ma tu ferq nêkenê mîyanê lehçeyanê kurdkî. Lehçeya kurmanckî, sorankî, gorankî û lurkî zî leteyê ziwanê ma yê. La seba ke ma aîdê lehçeya kirmanckî (zazakî) yê, coka ma wazenê hîna zaf xizmetê lehçeya xwu bikin.

Na lehçe, yanî kirmanckî (kirdkî, zazakî, dimilkî), sey gorankî (hewramkî), lehçeyanê kurdkî yê tewr verênan ra ya. La zaf erey pê nusîyayo. Kitabo tewr kehen ke bi na lehçe nusîyayo, kitabê Ehmedê Xasî Mewludê Kirdî yo. No kitab serra 1899 de Diyarbekir de çap bîyo.

Ewro zî Homayî ma rê kerd qismet, ma şaristanê Diyarbekirî de na rey rojname danê çape ro.

Wendoxê delalî!

Dezgeyê Zanist, Perwerde û Kulturî yê Yewîya Neteweyan (UNESCO) raporê xwu de beyan kerdo ke “kirmanckî (kirdkî, zazakî, dimilkî) mîyanê 20 serran de, mîyan ra wedarîyena, bena vindî.”

Ma zî naye hol zanê, ziwano ke tutî (gedeyî, qeçekî, qijî, domanî) pê qisey nêkerê, heqîqeten mîyanê vîst-hîris serran de beno vindî.

Şarê ma zî vano, ma serhuşk ê, ma înadin ê. Û ma zanê ke înad zî yew murad o.

Bêrîn ma pîya înad bikerin ke na lehçeya ma neke vîst serrî, wa bi hezaran serrî biciwîyo. Bibo ziwanê perwerdeyî, bibo ziwano resmî.

Haydê birayên!

Ma dest bidîn yewbînan. Bi wendiş, bi nuştiş, bi qiseykerdiş ma kirmanckî (kirdkî, zazakî, dimilkî) bikerin ziwanê sûke, ziwanê çarşî, ziwanê bazarî, ziwanê bazirganîye, ziwanê perwerdeyî, ziwanê resmî.

Wendoxê erjayeyî!

Ma paweyê rexne û pêşnîyazanê şima yê. Ma paweyê nuşte û mektubanê şima yê. Ma paweyê piştgirîya şima yê. No rojname, yê ma hemîne yo. No rojname, xizmetê kurdkî de yo. Kurdkî ziwanê ma yo. Ziwan nasnameyê ma yo. Ziwan rûmetê ma yo.

Hetanî hûmara diyine bimanên weşîye de, bimanên selametîye de.*

________________

* Newepel, Rojnameyo kulturî yo 15 roje, Hûmare 1, Dîyarbekir 15-31 adare 2011, r. 2