Nuşteyê Edîtorî yê Rojnameyê Newepelî-24

Bî serrêk ke Newepel weşana xo pancês rojan ra reyê bê mabeyn domneno. Hûmara yewine, ma pancêsê adara 2011î de vetbî.

Amancê ma yê awankerdişê komela Ziwan-Komî zî vetişê Newepelî zî no bi ke ma senî kirdkî aktuel bikîn; ma kadroyan perwerde bikîn ke wareyê nuştişî de, edebîyat û huner de kirdkî aver şêro. Çunke ziwan bi nê xebatan aver şino. Nika ma fetelînê xo ra pey bala xo danê na xebate ser, heqîqeten zî tarîxê ma de nê her di teşebusî zî ceribnayîşê muhîm û tarîxî yê. Ma çend kesê ke merkezê na xebate de yîme, ma gelek ezîyet û zehmetî ante, nika zî rewşa ma nêvurîyaya. La gama ke ma ewnênê firêzeyê xo ra, ma kar û zerarê xo danê têver, heme ezîyet û zehmetî vîrê ma ra şinê. Herinda dej û dirbetê ke bêfesal û bêhurmetan ra nat û wet ginayê zerrîya ma ro, cayê ê birînan de gul û vilî abenê…

Eke ma raşte vajîme, esas problemê ma kurdan xora zaf giran ê. Kurdbîyayîş bi xo karêko zehmet o. Çunke ma miletêko bindest îme; ma her çîyê xo de ereymende yîme. La eke merdim hema reyêk hîsîyatê milî nas bikero; doza welatî de, doza averşîyayîşê neteweyî de serkewtişî tehm bikero, dinya de tu zewqêk ney ra weşêr çin o.

Ez hema sere de naye vajî, înanê ke bîzzat nuşteyê xo ma rê şawitê, înanê ke hetanî ewro Newepel de nuşto, 75 kes ê. Înanê ke roportaj dayo, yan ma vajîme nuştoxê sey şaîr Memî, sey Ehmedê Xasî, sey Şêx Evdirehîmî ke ma nuşteyê înan çimeyan ra neql kerdê tede nîyê. Nê 75 kesan ra tewr tay 40 (*) kesan reya verêne Newepel de dest bi nuştiş kerdo. Mîyanê yew serre de çarçewaya na xebata mutewazî de; hem kursan hem zî weşanayîşê Newepelî reyra çewres kesan dest bi nuştişê kirdkî kerdo. Nînan ra qismêko muhîm, tewr tay nêmeyê nînan, êdî daîmî nusenê. A serkewtişê ma no yo.

Ez nika nameyê nê 75 nuştoxanê ma yê nê 24 hûmaran dana:

Adir Tilistone, Alî Aydin Çîçek, Alî Beytaş, Ayhan Sarigol, Bawer Xebat, Bedrîye Topaç, Berxwedan Pîranij, Bîlal Zîlan, Burçîn Asna, Cemal Azij, Deniz Dilar Pîrejmanij, Doxan Karasu, Duzgun Axdat, Ednan Bermazî, Ehmed Kirkan, Ehmedê Dirihî, Elîyê Qasimûn, Emîne Guzel, Enwer Yilmaz, Erdal Demir, Esra Altun, Ezîz Derdan, Ferat Roşna, Ferîde Sêwrekij, Gursel Bîngol, Hesê Belê, Hesen Çakir, Hesen Fehmî Kara, Hesenî Giran, Huseyîn Çakan, Huseyîn Karakaş, Îbrahîm Bîngol, Îrfan Sîmserkîsij, Îsmaîl Guven, J. Îhsan Espar, Lezgîn Gozen, M. Sebrî Akgonul, Mahîr Dogan, Malmîsanij, Mehmed Seyîtalîoglu, Mehmed Yergîn, Menaf Mutlu, Meqsed Muqrîyanî, Mistefa Gomayij, Mistefa Karadagli, Mistefa Şahîn, Mucahîd Baran, Murad Bakudan, Murad Canşad, Mutlu Can, N. Celalî, Nadîre G. Aldatmaz, Netîce Altun, Newzat Anuk, Newzat Valêrî, Nûrî Keleş, Osman Tetîk, Pişar Xançukij, Remezan Yalinkaya, Rindê Becerîklî, Rohelat Aktulum, Roşan Lezgîn, S. Ozan Aslan, Serdar Bedirxan, Seyîdxan Kurij, Sînan Sutpak, Şeyda Asmîn, Umer Farûq Çetînkaplan, Umer Farûq Ersoz, Wehdet Sîwanij, Weysel Hanyildiz, Wisivê Murtî, Xeyrî Yaşar, Xurşîd Mîrzengî û Zerrweş Xodî.

Xebata ma de çîyo tewr muhîm no yo ke ma yew bi yew nuştoxanê xo de eleqedar benê. Bitaybetî nuşteyê ke înternetî ser a yenê, ma karê redaktekerdişî sey perwerdeyî gurenenê. Ma nuşte kamca de rast kerdo, bi rengo sûr îşaret kenê, nuştoxe yan nuştoxî rê apey şawenê ke şeklo rastkerde û şeklo verên bidê têver, muqayese bikerê. Bi no qayde xeletîyanê xo bivînê ke reyna hîna rast binusî. No metod perwerdeyêko rastîn o.

Ganî ma naye zî xo vîr ra nêkîme. Nuştiş ra teber, beno ke bi seyan merdiman zî reya verêne bi Newepelî dest bi wendişê kirdkî kerdo.

Mi 1995 ra hetanî 2001 rojnameyê Azadîya Welatî de nuştêne. Yeno vîrê mi, destpêk de hûmara nuştoxanê ke mîyanê sînorê Tirkîya de kirdaskî nuştêne, des kesan ra vêşêr nêbî. La bi sayeyê weşana Azadîya Welatî, Nûbihar, Rewşen û sewbîna kovaran, ewro belkî hezar ra vêşêr kadroyê nuştoxîya kirdaskî virazîyayê. Eke ma zî nê prosesî wina dewam bikîn, ma wayîrîya rojnameyê xo bikîn, ez bawer a ke mîyanê çend serran de kadroyê kirdkî zî êdî bi seyan virazîyenê.

Ziwanê ma îmkananê dewlete ra bêpar o. Ma mecbur ê ke nê venganeyî bi medyaya xo, bi xebata xo ya sivîle pir bikîn. Na merhele de sewbîna çareyê ma zî çin o.

Şarê ma ra, miletê ma ra, wendox û nuştoxanê ma yê bihîsîyatan ra ricaya ma na ya ke, ma pêro pîya bineyna xeyret bikîn. Hetê madî ra, hetê vilakerdişî ra, hetê peydakerdişê aboneyan ra kêmanîyê ma zaf ê. Ma bineyna paştî bidîme na xebate, bineyna xeyret bikîme.

Keda gelek kesan xebata ma de esta. Nika ca çin o ke ma nameyê hemîne binusîn. Înşalah yewna nuşte de ma do qalê înan zî bikîn. Nika ma heme dost û embazan rê yew bi yew sipas kenîme**

_______________

* Mi bi xo nameyê 46 kesan hûmarit. La mi waşt reqemêka biîhtîyate bidî.

** Newepel, Rojnameyo kulturî yo 15 roje, Hûmare 24,  Dîyarbekir 01-15 adare 2012, r. 2