Nuşteyê Edîtorî yê Rojnameyê Newepelî-25

Hûmara bîne de ma va, hetanî nika 75 kesan ma rê nuşteyî şawitê, nînan ra tewr tay 40 kesan reya verêne Newepel de dest bi nuştiş kerdo. Na hûmare de çend merdimanê bînan zî reya verêne nuşteyê xo şawitî. Yanî merdim şêno vajo ke her hûmare de di kesan reya verêne dest bi nuştiş kerdo. Mi gore no serkewtişêko zaf muhîm o, ezîyetê ma, xebata ma semereyê xo dana.

Newepel, tewr zêde Dîyarbekir de roşîyeno. Merdim şêno vajo ke Dîyarbekir de her tebeqeyê şarî ra, her mesleg û emr ra wendoxê ma estê.

Endamanê komela ma ra Ehmedê Dirihî û Dr. Deniz hûmara tewr verêne ra nat her hûmare ra da-vîst hebine gênê vila kenê. Ancî Alî Fuad û Henîfî Pîranij zî roja ke bîyê endamê komela ma, ê zî her yew da-vîst hebine benê kenê vila. Îdarekaranê komela ma ra Hesen Çakir rojnameyî kitabroşan û bufeyan ra keno vila, goreyê îstatîstîkanê ey ra tewr tay 60 hebî nê cayan de roşîyenê. Îdarekaranê komela ma ra Seîd Aydogmuş zî destpêk ra hetanî ewro tayê hûmaran ra gêno beno keno vila, seba karê rojnameyî xeyret keno. Hewna endamê komela ma ra Mehmed Yergîn zaf xeyret keno. Meqsed Muqrîyanî endamê komela ma nîyo la sey endamê komela ma rojnameyî rê wayîrîye keno. Ma keda hemîne teqdîr kenê û înan rê yew bi yew sipas kenê.

Nînan ra teber zî qasê da-des aboneyê ma estê ke ma bi posta înan rê şawenê, ancî gelek kesî ma ra bi xo gênê. Yanî merdim şêno vajo ke Dîyarbekir de 200 heb ra vêşêr wendoxê ma yê daîmî estê.

Ganî ez naye zî vajî, karê komele de û bitaybetî zî xebata Newepelî de ardimê Sidqî Zîlanî zaf o. Bîy çend serrî karûbarê komele, xizmetê Newepelî heme buroyê ey de beno. Xora verê cû zî qasê serrêk odayêka buroyê xo seba kovara Vateyî abirnaybî. Nika ma qismêkê buroyê ey hem sey embarî hem sey cayê kombîyayîşî, cayê xebata amadekerdişê rojnameyî û hem zî sey cayê yewbînandîyayîşî şuxulnenê. Ma bi erebeyê ey rojname metbea ra anê, ma pê benê garajê otobusan. Her hûmare de tewr tay çar-panc paketanê ma nameyê şîrketê xo ser o bi kargo şaweno. Ma rê zî meymananê ma rê zî, îkramkerdişê çay û qewe ra, meywe ra, her hawa ezet û îkram ra xo apey nêdano. Nê xizmetî bi zerrweşîye û rîhuyayîş keno. Çiyo tewr muhîm, ge-ge nuşteyanê xo de yan teber ra seba wayîrvejîyayîşê kirdkî çîyê vajo zî esla mudaxeleyê xebata ma nêkeno. Ez eşkena vajî ke zafê reyan ma hêrs benê, ma qîrenê, ma qelebalix kenê, heta ke ma ey rexne kenê; şar teber ra eleyhê ey de her hawa vateyanê neheqan vano la camêrdî hetanî ewro qet xuyê xo teng nêkerdo. Seba na ardimperwerîye ma ey rê zaf sipas kenê.

Çewlîg de destpêk de Newzat, nika Osman rojnameyî de eleqedar beno. Newzatî Mêrdîn de zî kerdêne vila la nika Ednan keno vila. Anqara de mamosta Mistefa Şahîn, ancî N. Celalî û tayê xort û cinîyê bînî destpêk ra hetanî ewro hertim wayîrîya rojnameyî kerda. Ma rê nuşteyan nusenê, nuştoxanê neweyan teşwîq kenê. Ma bi wasitayê mamosta Mistefayî destpêkê êlula 2011î ra nat Bongilanî rê şawenê. Îzmîr de Mutlu Can her hûmare ra qasê pancas hebîne keno vila, ge-ge ma rê nuseno. Sêwregi de mamosta Ehmed Kirkan rojnameyî keno vila, xizmetêko baş keno. Îstanbul de C.Z.Pîranij û Xarpêt de kek Mistefa Gomayîj eleqedar benê. Ey ra teber, Îsmaîl Guven zî wayîrîye keno. Ma hemîne rê yew bi yew sipas kenê.

Mersîn de, hûmara verêne ra hetanî ewro Onur keno vila. Endamê ma Mehmed Akyol, ancî nuştoxê ma Alî Beytaş û sewbîna embazî estê ke eleqedar benê. Enwerî çend hûmarî berdî Dara Hênî de kerdî vila. Dêrsim de, destpêk de xortêk kerdêne vila, nika yewna xort eleqedar beno. Ma hemîne rê sipas kenê.

Ma hetanî da-des hûmarê Newepelî, kovara Şewçila zî tede, Gimgimî rê, Merkezê Kulturî yê Ciwanan rê bi kargo şawitêne. Ma uca ra zî eynî sey Dêrsimî tu pere nêwaşto. La ma ewnîya ke tu cewabêk uca ra nêno ma zî nêşawit.

Zîndanan ra, keda Murad Canşadî na xebate de zaf a. Ancî Sînan Sutpak, Umer Faruq Ersoz û hema zaf embazanê bînan hem ma rê nuşteyî şawitê hem zî hertim moral dayo ma. Ma hemîne rê yew bi yew sipas kenê. Ewropa de zî tayê embaz û dostan, tayê nuştoxanê ma bi nuşte û aboneyîya xo yan zî peydakerdişê aboneyan ardimê ma kerdo.

Ancî zaf kesî estê ke ardimê ma kerdo, ma nameyê hemîne nêva, la ma înan rê yew bi yew sipas kenê. Çîyo ke nê heme merdiman ano têhet helbet welatperwerî ya, erjê muşterek ê, yanî ziwan o. Eke wayîrvejîyayîş bineyna bizêdîyo, her kes hindavê xo ra bineyna xeyret bikero, înşalah ma çend gamî hîna aver şinê. *

_______________

* Newepel, Rojnameyo kulturî yo 15 roje, Hûmare 25,  Dîyarbekir 15-31 adare 2012, r. 2