Nuşteyê Edîtorî yê Rojnameyê Newepelî-56

Wendoxê delalî!

Bî 56 rey ma nê quncikî ra xîtabê şima kenê. Hetanî nika ma heme nuşteyî bi keyf û heyecan nuştî la nê nuşteyî de ma xemgîn ê. Tam wexto ke hewceyî bi averberdişê kirdkî esto, nê demê ke qedexe ziwanê ma ser a wedarîyayo û tam wext wextê xebate yo, ma bêîmkanîye ra, bêeleqeyîye ra, tengane ra vetişê rojnameyî de zaf zehmetî ancenê. Coka ma fikirîyenê ke mecburen qederêk mabeyn bidin weşana rojnameyî.

Sedemê cîya-cîyayî yê nê fikrê ma estê. Nînan ra yew, Dîyarbekirê xopanî de êdî yew mekano ke ma bieşkîn tede xebata xo bikin çin o. Hetanî nika ma xebata xo buroyê Pasur Medya de kerdêne. La Pasur Medya gêrîya û buroyê xo kerd veng. Ma vanê keyeyê înan hezar rey awan bo.

Sedemê diyin, bi rastî hetê madî ra ma hertim zehmetî ante. Heme karê rojnameyî ma xo rê kîseyê xo ra kerd. Ma tena waştêne ke mesrefê metbea, posta û kargoyî vejîyo bes o. La zafê reyan o zî nêvejîyayêne. Ma her hûmare de tewr tay 600-700 TL mesrefê metbea, posta û kargoyî danê. 56 hûmaran de nêzdîyê 35-40 hezar TL pere keno. Rotişê rojnameyî ra, aboneyan ra, aîdatê endamanê komele ra çarine ra yewê nê mesrefî zî nêameyo. O bîn heme nas û dostan, embazan ardim kerdo yan zî ma xo rê cêba xo ra dayo. La nika ma xetimîyayî.

Ma nameyê komela Ziwan-Komî ser o Newepelî vejenê. Qasê da-vîst endamê na komele estê. Tayê endaman destpêk de çend mengî aîdatê xo da la o zî ma da heqê kîraya dayreyêk ke çend mengî bîlasebeb kewt ma mil. Zafê endamanê komele badê çend menganê destpêkî hem wezîfeyê xo hem zî rojname kerd xo vîr ra! Ganî ma heqê înan vîndî nêkin ke tayê endaman zî hetanî peynî ardim de texsîr nêkerd. Labelê dostanê ke ardimê rojnameyî kerd hîna zaf teberê komele ra bî. Ma her kesî rê, hemîne rê yew bi yew sipas kenê.

Karê amadekerdiş, vetiş û vilakerdişê rojnameyî de zî ma zaf ezîyet ancenê. Ma vajîm ke hepisxane ra nuşteyî yenê, ma hemîne bi destê xo newe ra komputure de nusenê. Nuşteyê ke pê e-mail yenê, ma redakte kenê. Ma kam herfe yan çekuye rast bikin, bi reng îşaret kenê. Şeklo ke nuştoxî yan nuştoxe nuşto û şeklo ke ma rast kerdo, ci rê apey şawenê ke bido têver, xeletîyanê xo bivîno û reyna rast binuso. No karêko zaf zehmet o. 55 hûmaranê Newepelî de 165 kesan nuşto. Nînan ra qasê 140 kesî reya verêne Newepel de dest bi nuştiş kerdo, coka zafê înan nuştiş de xeşîmî bî. La mîyanê nînan ra gelêk kesî nê prosesî de baş musayî wendiş û nuştişê kirdkî. Ma kirdkî kerde ziwanê çapemenîye, ma bi seyan eserê xo yê folklorîkî arêdayî, vîndîbîyayîş ra xelisnayî. Ancî xebata ma reyde gelêk edebîyat vejîya meydan…

Ewro her hûmara Newepelî xezîneyêka heqîqî ya ziwan, folklor, edebîyat û kulturê ma ya. Mesela, 56 hûmaran de 1150 nuşteyî weşanîyayê. Serkewtiş yan zî qezencê ma yo tewr muhîm no yo. Eke ma vajîn Newepel musayîşê wendiş û nuştişê kirdkî de sey mektebî yo, qet zî mubalexe nîyo. Axir ma çi vajin zî, tarîx de cayê ma çi yo, helbet rojêk do tayê merdimî tesbît bikerê.

Redaktekerdiş, weçînayîş, cadayîş, mîzanpaj, newe ra wendiş, kontrolkerdiş, rastkerdişê xeletîyan, metbea ra ardiş, paketkerdiş, etîketkerdiş, kargo û postaxane ra şawitiş… Nê heme karî bi fek vatiş asan o, la kerdiş! Dima, ma teqîb kenê ke hela resayê cayê xo yan ney. Esas nê karê yew ekîbe yê, la ma xo rê bi destê xo kenê. Ma xo rê kîseyê xo ra, bi fedakarîye kenê. Neke tena keda zêhnî û keda destan, zafê reyan ma kîseyê xo ra mesref kenê. Gonîya ma qasê yê mîlçikêk a. Eke di çilkî pêser o şina, ma kewenê ruhî ver! Ma kam ê? Êdî şima texmîn bikerê!...

Seba çî? Yanî çi semed ra ma hende xo danê kezlatîye? Heme seba mîlîyetê xo yo; seba averberdişê ziwan, kultur, edebîyat, huner û nasnameyê xo yê neteweyî yo. Seba qedr û rûmetê ziwanê ma yo. Seba hedefêkê şexsî kes xo dano nê suxreyî ver? Mîsqalêk qezenco madî tede esto?

Nêzdîyê hîrê serran o ke ma nê rojnameyî vejenê. Ma qasê mîsqalê zere poşman nîyê, ma bi nê karê xo îftîxar kenê. Çunke ma karêko pak û tarîxî kenê. Ma esla minet nêkenê; ma wezîfeyê xo kerdo. Labelê sînorê quwet û qudretê merdimî zî heta cayêk o.

Ma tîya ra veng danê miletê xo, venga her kesî danê. Eke dewlemendêk yan dezgeyêkê ma bieşko ca bido ma û piştgirîya ma bikero, ma rojnameyê xo dewam kenê, ma rojnameyê xo vejenê. Çunke rojname xizmetêko heqîqî yê ziwanê ma, xizmetê edebîyat, huner û kulturê ma keno; xizmetê milet û mîlîyetê ma keno. Esla nêbîyo cayê propagandaya şexsan yan zî grûban û do nêbo zî. Newepel, milet û mîlîyetê ma esas gêno.

Ma bi na hûmare venga heme kurdan danê. Beno ke çend dildarî vejîyê yew kampanya bidê destpêkerdiş yan yew çare bivînî. Eke mîsqalêk zî qula roşne ma ra biasîyo, ma Newepelî dewam kenê. Labelê eke rewşe wina bo ma bin de pelixîyenê. A game ma mecburen, bêzerrîya xo, weşanê rojnameyî vindarnenê.

Êdî şima qerar bidîn...*
_______________

*No nuşte, “Newepel, Rojnameyo Kulturî, Hûmare 56, Dîyarbekir, Oktobre 2013, r. 2” de weşanîyayo.