Nuşteyê Edîtorî yê Rojnameyê Newepelî-57

Wendox û heskerdoxê ziwanê xo!

Hûmara 56. de ma vatibi ke vetişê Newepelî de ma tengane de yê. Ma waştibi ke seba dewamkerdişê weşanê Newepelî hewceyî bi her hawa eleqe, paştgirî û ardimî esta. Ma vatibi, eke rewşe wina bo, ma dewam nêkenê.

Nika ma nê vengdayîşê xo tekrar kenê. Çunke rewşa ma nêvurîyaya. Desteko ke ma hêvî kenê û wazenê nêameyo. La ma nêeşkenê vajin ke tu kesî wayîrîye zî nêkerd. Çend merdiman, belkî qasê hûmara engiştanê destêk embazî xemgîn bîyî, dewamkerdişê rojnameyî waşt. Di-hîrê endamanê ma yê komele aîdatê xo da. Teber ra zî di-hîrê embazan sozê ardimêkê cuzî da. Mesela, yew doktorê ma vato, ez her menge se lîra dana, ancî yewna wendoxê ma ke Îstanbul de maneno va, ez her aşme se û pancas lîra şawena. Xulasa ma dest pêkerd na hûmare amade kerde. La hewceyîya ma her game bi ardimî esta çunke rewşa ma sey verî ya, çîyo newe çin o.

Meselaya cayî eynen dewam kena. Xora verê cû zî ma nê karê xo keye de kerdêne, la qet nêbo yew buro estbi ke ge-ge wendoxî ameyêne, xo rê uca ra rojname berdêne. Ma uca sey arşîvê Newepelî û kovara Şewçila gurenayêne, ma uca rojname paket kerdêne… La nika cayê ma çin o!

Ma nameyê komela ma Ziwan-Komî ser o banka de hesab akerd. Numreyê hesabê ma wina yo.

Seba TL

Kodê Şube: 1622

Hesab No: 66144169-5001

IBAN No: TR610001001622661441695001

Seba Euro

Kodê Şube: 1622

Hesab No: 66144169-5002

IBAN No: TR340001001622661441695002

Ardimkar, abone û endamê ma yê komele êdî eşkenê ardim, aboneyî yan zî endamîya xo dîrekt bierzê nê hesaban.

Birastî ma bizanayêne ke nika yew rojname yan yew xebata ke cayê Newepelî dekena esta, ma hende israr nêkerdêne. Ma nêvanê ke ma ra teber kes xebate nêkeno, helbet tayê xebatê ke kirdkî de benê estê. La ferqê Newepelî no yo ke wendiş û nuştişê kirdkî de rolê mektebêk kay keno. Mesela, ma fîhrîstê 56 hûmaranê Newepelî vet û www.zazaki.net de weşana. No fîhrîst ra zî bi hewayêko zelal aseno ke 56 hûmaran de 1189 eserê 203 kesan tede weşanîyayê. Nê 203 kesan ra, nuşteyê 24 kesan sewbîna çimeyan ra neql bîyê yan zî tercume bîyê. Yê bînan rasterast Newepelî rê nusîyayê. Înanê ke rasterast Newepelî rê nuşto ra nêzdîyê 150 kesan reya verêne Newepel de dest bi nuştiş kerdo ke nînan ra zî 21 kesî cinî yê. Nuştoxanê ke reya verêne Newepel de dest bi nuştiş kerdo ra êdî çend kesî wayîrê yew yan di kitaban ê. Esasê xo de rolê Newepelî no yo.

Her çî ra ver, Newepel rojnameyêko sivîl şarê ma yo. Temamen bi fehmêko sivîl û bajarvanî weşanê xo dewam keno. Yanî organê weşanî yê rêxistin yan partîyan nîyo, miletî esas gêno. Newepel de, bêke eleqeyê fikr yan aîdîyetê sîyasî yê kesan bikero, bêke mudaxeleyê hawayê fikirîyayîş û xoîfadekerdişê însanan bikero, bêke şekl bido hawayê fikirîyayîş û ciwîyayîşê wendoxan, bi hawayêko tebîî kadroyanê kirdkî perwerde keno.

Ancî materyalêko zaf muhîm yê Newepelî folklorê kirdkî yo. Na merhele de arêdayîş û qeydkerdişê folklorê kirdkî zaf muhîm o, heyatî yo. Çunke folklorê ma tehluke de yo; her ke kokimê ma dinyaya xo bedilnenê folklorê ma zî wina helîyeno beno vîndî.

Xulasa zerrîya ma ra nêna ke ma fek na xebate ra veradin, wijdanê ma tehemul nêkeno. Labelê seba ke quwet û qudretê ma qîm nêkeno, coka ma paştgirî teleb kenê. Heto bîn ra no karêko neteweyî yê ma hemîne yo, coka eke mumkin o, her kes cayê xo de bilebitîyo, aboneyan peyda bikero yan bibo abone, rojnameyî vila bikero, bido wendiş zaf baş beno. Ma zî a game hîna zerrî ra rojnameyê xo dewam kenê. Belkî her kesî ra zafêr hewceyîya ma bi moral û motîvasyonî esta.

Hetanî yewna hûmare bimanîn weşîye de, bimanîn selametîye de…*

____________

*Newepel, Rojnameyo Kulturî, Hûmare 57, Dîyarbekir, Teşrîne 2013, r. 2