Planê DYA yê Hêrîşkerdişê bi Îranî Esto

Sererkanê DYA Oramîral Michael Mullenî va, yew planê DYA yê hêrîşkerdişê bi Îranî esto la hêrîşkerdiş fikrêko baş nîyo.

Sererkanê DYA Oramîral Michael Mullenî kanalê NBC, programê "Meet the Press" de va, eke hewceyî pê bibo mudaxeleyêkê leşkerî sey alternatîfêk ha masa ser o. Oramîral Michael Mullenî va, eke rewşe bireso a merhele, yew plan destê artêşe de esto la derheqê planî de teferuat nêda.

Oramîral Michael Mullenî beyanatanê xo yê verênan de zî vatbi, êrîşkerdişê bi Îranî do Rojhelatê Mîyanênî de tesîrêko zaf cîdî bikero.

Heto bîn ra Îranî zî vera îfadeyanê “ma wayîrê yew planê hêrîşkerdişê bi Îranî yê” îqaz kerd û va “do cewabê ma zaf sert bo”.

Goreyê xebera ajansa ÎRNA ra, muawinê qumandarê muhafizanê şorişî yê Îranî Yedullah Civanî va “Yew xetaya qijkeke yê amerîkayijan do ewlehîya kendawê Besra bifîno mîyanê tehlukeyî.”

Civanî va, “Kendawê Besra mintiqayêka stratejîk a. Eke ewlehîya na mintiqa bikewo tehluke, do ê zî zerar bikerê. Û cewabê ma zî do sert bo.”

Serekkomarê Îranî Mehmûd Ehmedînejadî demecê xo yê ke dabi rojnameyê Amerîka New Yorkerî de va “Tecrubeyanê Îraq û Efxanîstanî nîşan da ke sîyasetê tehekumîye yê DYA mintiqa de ser nêkeweno. Mintiqa ra apey agêrayene ra teber sewbîna çareyê înan çin o.”

Ehmedînejadî demecê xo de va, “Dişmenîya ke dewletê rojawanî vera şarê Îranî de kenê, rabirdûyêkê xo yo xorîn û tarîxî esto.”

Heto bîn ra, wezîrê karê teberî yê Îranî Menuçehr Mutteqî zî va, “Seba muzakereyê DYA reyde tu telebêkê ma çin o, çunke hişê ma derheqê polîtîkaya teberî ya Waşîngtonî de zelal o.” 

Heto bîn ra xebera ke hûmara êlule ya kovara The Atlantic de weşanîyaya, DYA û Îsraîl ra 40 karbidestanê muhîman reyde na babete ser o mulaqat ameyo kerdene. Heme karbidestî vanê, îhtîmalê emser êrîşkerdişê Îsraîlî bi Îranî se ra pancas o. Îsraîl plan keno ke bi teyareyan asmênê Erebîstanê Suûdî yan zî Îraqî ra êrîşê Îranî bikero û heme tesîsanê nukleerî yê Îranî îmha bikero.