Pêşnîyaze

Pola newe dekewtbî hepisxane. Panc-şeş mengê ci bibî ki o dekewtbî hepisxane. Êdî hepisxaneyandê bînan ra embazanê ci, silasnayanê ci, ci rê mektubî riştê.

Vilaweka berpisrsîyarî amebî, ma heme roniştbî ki biwanê û bizanê ki berpirsîyarî bi îdare ya çi qisey kerdo, çi qerarî gêrîyayê. Vilaweke wanîyaye. Çiçî ser o amebî qisey kerdene, îdareyî sozê çiçî dabî, çiçî qebul nêkerdbî… vilaweke degirewta bî.

Embazê berpirsîyarî vilaweke wende, qedîna û vat “Çîyêndo ke nêame fehm kerdene esto?” Kesî hesê xo nêkerd. Embazî fina pers kerd vat “Pêşnîyazê embazan estê?” Kesî hesê xo nêkerd. Embazî vat “Waredê nûnertîye de rexneyê embazan estê?”

Na perse ser o embaz Polayî destê xo kerd berz. Embazî vat “Vaje, embaz Polat!”

Polayî vat “Waredê nûnertîye de rexneyêndê mi esto!”

Embazî vat “Kerem bike embaz Pola.”

Polayî vat “Nûnertîya ma zaf sist a, pasîf a. Qoparicî nîya! Çîyê ki hepisxaneyandê bînan de estê, çî rê hepisxanedê ma de çinî yê?”

Embazê berpirsîyarî vat “Mesela çiçî, embaz Pola? Nameyê çîyan vaje ki ma binusnî û birêşê embazan rê, wa pêvînayenda heftedê bînî de ser o vinderê, biwazê.”

Polayî vat “Mesela, ê lastîkinî.”

Embazê berpirsîyarî vat “Çiçîyê lastîkinî?”

Polayî vat, “Ê ki merdim pif keno ha!”

Berpirsîyarî vat “Ti yê qalê balonan kenê?”

Polayî vat “Nê nê, embaz! Qandê şewe şewe. Ê ki kes pif keno, bi şewe keno xo virare…”

Berpirsîyarî vat “Haaa!... Embaz Pola, ti kotî ra pêhesîyayî ki înan danê hepsîyan?”

Polayî vat “Embaz, beno ki ma newe yê. Zeydê şima ya des-pancês serrî ma hepis de nêvîyarnayo. La ez bi embazandê bînan a, hepisxaneyandê bînan a, bi mektuban a dayen û girewtene virazena. Embazan mi rê nusnayo. Mektube mi het a. Tede vano ki…”

Berpirsîyarî huyayîşê xo bi zor a tepîşt û vat “Embaz Pola! Ti na jîwer de yeqîn ê?!”

Polayî vat “E e, embaz! Herçend o embazo ki mi rê nusnayo, embazê minê qeçekên o, hebê henekvan o. La na mesela de zaf cidî yo, vano, ma her şewe pif kenê, kenê xo virare û pa rakewenê, şew ra pifê ci vera danê, qat kenê, hewa danê…”(*)

Hepisxaneyê Elbîstanî, Êlule 2011 

___________

(*) No nuşte Newepel, Rojnameyo 15 roje yo kulturî, hûmare 15 (16-31 oktobre 2011), r. 6 de weşanîyayo.