Qerarê Mehkeme: Qetlîamê Helebçe Jenosîd o
AKnews
Mehkemeya Temyîzî yê Îraqî ewro qeraro ke girewt de êrîşê kîmyewî ke 16 adare 1988 de qezaya Silêmanîye yê Kurdîstanê Başûrî Helebçe ser o virazîyabi sey jenosîdî qebul kerd.
Avûkatanê dewaya Helebçe ra Bekir Hemed Sidîqî da zanayîş ke qerar bi zafaneya rayan gêrîyayo û va, “Goreyê madeyê 12. yê qanûnê 10. ke 2005 de vejîyabi herinda îbareyê ‘suco ke derheqê merdimîye de bîyo’ çekuya ‘jenosîd’ ronîya.”
Bekir Heme Sidîqî va, “Ganî bi hawayêko acîl tazmînat bidîyo bi şarê Helebçe.”
Seke yeno zanayîş, peynîya şerê Îran-Îraqî de rejîmê Baasî bi bombeyanê kîmyewî êrîşê Helebçe kerdbi, netîce de 5 hezarî ra vêşêr kurdî merdbîy û 10 hezarî ra vêşêr zî birîndar bibîy. Rejîmê Baasî eynî serre qasê 180 hezar kurdî netîceyê operasyonê ke bi “Enfal” name kerdêne, bi komelî kiştbîy.
Badê ke rejîmê Baasî rijîya, serra 2003 ra pey, Mehkemeya Cezaya Girane yê Îraqî çarçewaya sûcê ke rejîmê Baasî pêşengîya Sedam Huseynî de kerdbîy de Elî Hesen el-Mecîd ke bi leqemê “Elî Kîmyewî” şinasîyayne, dewaya Helebçe ra bi îdam mehkum kerdbi û roja 25 çele 2010 de dar de kerdbi.
__________
Şîrove Bike
Yewna rê bişawe 
Prînter Bike
Acor
