Qirkerdişê Şarê Dara Hênî û Husênê Zeri

Qezayê Çewlîgî Dara Hênî wextî herbê Şêx Seîdî di wîlayet bî. Muxtarê dewê Kuparî apî babê mi Husênê Zeri (Hüseyin Yılmaz) o. Benatê Kupar û wîlayet yew kîlometre yo. Inê ra tayî memurî hukmatî Kupar de niştênî ru. Husênê Zeri hedîsûnê zereyê hukmat ra bi wasiteyê inî memurûn xeber girotînî.

Husênê Zeri merdimeko zînekin û aqil o. Ruejêk derheqê şarê wîlayet de xeberûn xirabin eşnaweno. Derheqê raştîyê xeberûn di şubhi keno la rênê dor û dormalêyê xwu ra pers keni. Heta walî, meqamûnê eskerî û kûmi yeni vîri şini muracat keni. Tayin de qisê keni, tayin de zî nêşkeni qisê bikeri. Merdimî ke tede qisê kerdî fekgirote yê, xeber teber nedûnî. Husênê Zeri şik keno ke çiko xirabin beni la texmîn nekeni çiyo sênî beni.  

Zemûn, zemûnêko xidar o. Ayî ke daxîli hereketê serwedartişî bîyî, yew qisimê yin kişiyê, ayî ke mendî zafê yin tepîşyê. Tepişyeyê Mehkemûnê Îstîqlalî de mehkema benî û derheqî yin de qe xebêrî hol nêûmênî. Mileti di tersê kiştiş esta û ina ters ra nêşkênî xwi bixelisnî.

Yew rueji veraşûnêk muxtari yew ca ra xeber geno ke eskerûn pîr beni xuert beni, o ke destî yi çek, sîleh geno Derê Qul di ardî pêser û kişênî.

Husênê Zeri ca di bi azûn û pîlûnê dewi ûnceno pîyeser. Peynîyê pêserûmeyîşî di qijûnî Dewrêş Axa ra Husên û Heyderi (Hüseyin Kaya, Haydar Kaya) pa çend tenûn a şawenî lewûnê Kupari. Vûnî heta ma ra îşaret nêro şima hetî dew a sîleh erzenî.

Muxtar yew çila ke dara mazêr ra viraşte ya geno xwu dest û nişeni astuerê xwu ver bi Derê Qulî şino, yeni verî qelebalix. Ê serûn di şew bi adir reye kotiş yena menayê xebera fewqelade. Qomutûn cîgeni Husênê Zeri ra û vûni, “Ina şew a şewîn ti bi çi cesaret ûmê, tu ma r’ çi xeber arda?” Muxtar verî qelebalix ke pêy ra destî yin beste de pê vengo berz vûni, “Inî merdimî masum î, daxîl serwedartiş nêbî, ti heta înûn kişenî dewê ma mehkumûn girota, bîye ma dewi bixelesnî.” Ina qalê Husênê Zeri ser pîyori pîya heta nêzdîye dewi yenî. Rasta vengî silehûn yenî. Înûn (bawer) kenî ke muxtar raşta vûni. Qirkerdişê şarê Dara Hênî ra viyerênî û şari zî xelîsyeni.*

* No nuşte, Newepel, Rojnameyo kulturî yo 15 roje, Hûmare 18, Dîyarbekir 01-15 kanûne 2011, r. 6 de weşanîyayo.

Foto: Kenan Nîhat Elçî