Qismet

Cayke beno cayke nêbeno. Yew dew de yew şuwane, kulfetê ci û xeylê zî çarweyê ci benê. No şuwane hergu şewra çarwanê xwu beno çere, şan de ano keye. Dewijî zî nê şuwanî ra bol heskenê. Çarwanê xwu teslîmê şuwanî kenê. No çarwandê xwu ya piya çarwanê dewijan zî beno çere, dewijî heqê ci danê. No îdareyê keydê xwu, o ki dewijan da ci, o ki çarwe roşeno, no şekl a keno. Şuwane şew ra, şino şan de yeno keye, çarwanê xwu amoreno keno axur.

Rojê şan de çarwa amoreno keno axur se, ewneno ki yew çarweya ci kemî ya. No vano her hal mi yaniş amord, çend rojî tepîya ewneno yewna bî kemî. No şekl a, çend rojan ra finê yew bi yew çarweyê ci benê kemî.

Şuwane şop nano çarwan ser. Rojên vera êrî ewneno ki yew miye çarwan mîyan ra abiryena û vera koyî şina. Şuwane na mîyer teqîb keno, na şina şina, şuwane zî ci dima şino. Bindê koyî de yew mixara bena, miyê şina kewna a mixara, şuwane zî meraq keno o zî kewno mixara. Senî kewno mixara ewneno ki çiçî bivîno, mixara miyan de vergê esto, çihar lingandê xwu ra kût o. Miye zî sereyê xwu vergî vero kerdo çewt ki verg qirika ci ra tepşo ki ci biwero. Verg zî hema qirikda miyer ra gaz keno miyer kişeno û weno.

Şuwane mixara ra vijyeno, çarwanê xwu veradano û yeno keye. Şino keye de derg beno, xwu keno nêweş. Kufletê xwu rê vano, ez şuwaneyêna, ez o şewra şina, şan de yena. Ez o çi zehmeta nê çarwan bena çere û ana! Vano, Elah qismetê ê vergî rişeno lingandê ci yê kutan ver se, wa nay ra tepîya qismetê mi zî birişo mi ver, ez nêweş a, ez do no ca ra nêwerza pay û şuwanîn zî nêkera.

No ewna nezdîyê serrê dewam keno, xwu keno nêweş. Dewijî çarwanê xwu danê yewna şuwanî, kufletê şuwanî zî serrê miyan de çarwanê xwu jû be jû roşenê. Çarwan qedînenê, nê dew de benê neçar, veyşan teyşan manenê.

Şuwane ca de derg biyaye, nêwerzeno pay, înad kerdo, vano Elah qismetê ê vergî senî rişeno se wa ê mi zî birişo. Peyîna ci de kufletê şuwanî zî, şuwanî ver el eman kenê vanê ma ney bikişê ci bireyê. Vanê ridê ney ra ma dew de veyşan teyşan mendî, heta kotî ma do biewnê ney ra.

Yew vano ma xençerê qirikda ci ro dê ma bikişê, yew vano ma mar dekerê cadê ci, wa ci biperro bimiro. Yew vano tiya de komêna mozan esta, ma ê mozan lojin ra veradê ser, wa mozî ci perrê, xwura mireno.

Vanê temam, şinê koma mozan tepşenê ki lojin ra veradê şuwanî ser. Mozan lojin ra senî veradanê şuwanî ser se, her ge moz bena altûn ginena şuwani ser ro. Şuwane cadê xwu ser ra wurzeno pay vano ya Rebî to rê şikir, to zeydê vergî qismetê mi rişt ew altûnanê xwu arêdano pêser, kufletê ci şaş maneno, ewja de heme towbe kenê, vanê ya Rebî ti ma ef bike. Şuwane kufletê xwu ya piya weş-weş ciwîyeno, dîrligê nînan newede ra beno weş.

Qûl heta ki nêkewo teng, xizir biemrê Ela ya nêreseno.

Estanika mina weş, hewt koya peya bî leş!