Ramitiş, Rotiş û Şimitişê Esrarî Zêdîyayo

Nê da-des serranê peyênan de, bitaybetî badê ke agêrayîşê bi dewanê veşnayan û rijnayan bineyke serbest bi, şarê ma ra gelek kesan dest bi ramitişê esrarî kerd. Hem ramenê, hem roşenê û hem zî şimenê.

Qismêk şarê ma karê weyekerdişê pes û dewarî ra, ramitişê hêgayan û zîretî ra dûr kewto. Şaristanan da musayo tembelîye, xo nêdano zehmet. Coka wazenê bi kedêka zaf taye dewlemend bibê.

Dewan de kesê ke esrar ramenê, bitaybetî qereqolanê eskerîye reyde îrtîbat de yê. Hetanî ewro qet nêameyo eşnawitene ke tu qereqolêkê artêşa tirkan mudaxeleyê ramitişê esrarî kerdo yan tu kes tepîşto.

Tîya ra hetanî di serrî verê cû merkezê şaristanan de zî kes şimitiş yan rotişê esrarî ra nêtepîşîyayêne. Bitaybetî Dîyarbekir de esrar eşkera roşîyayêne û ameyêne şimitene. Coka zafê xortan bîy mubtelayê esrarî, bîy esrarkêşî.

Beno ke dewlete ewnîya ramitiş, rotiş û şimitişê esrarî zaf zêdîyayo, bêkontrol vila beno, bitaybetî ewnîya ke esrar şino reseno şaristananê rojawanê Tirkîya û xortê tirkan zî benê mubtelayê esrarî coka nê di serranê peyênan de dewlete dest pêkerdo, esrarî tepişena. Labelê bin ra vernî nêgêna, tena hetanî dereceyêk wazena ramitiş û rotişê esrarî kêmî bikero û eke mumkin bo nêverdo esrar şiro hetanî şaristananê rojhelatê Tirkîya.

Goreyê malumatê ke qumandarîya cendirmeyan ya şaristanê Dîyarbekirî dana, Dîyarbekir de hewt aşmanê verênan yê emserî de duwês tonî esrar tepişîyayo.

Goreyê malumatanê qumandarîya cendirmeyan ya şaristanê Dîyarbekirî, roja 01 çile ra hetanî 31 temmuza 2010î, yanî mîyanê hewt aşman de 237 operasyonê cîyayî virazîyayê. Nê operasyonan de 4 tonî û 511 kg. esraro kubar, 7 tonî û 378 kg. esraro toz, têpîze de 11 tonî û 889 kg. esraro hadre ameyo tepîştiş, 1 mîlyon û 262 kokê kenevîrî yê rehekî zî ameyê îmha kerdene.

Nê operasyonî û esraro ke gêrîyayo temam serê rayîranê ke Dîyarbekir ra şinê şaristananê rojawanî de gêrîyayo. Mesela, operasyono tewr peyên, yew erebaya xusûsî Dîyarbekir ra hetanî Antalya ameya teqîbkerdene, nêzdîyê Antalya de 2 merdimî 13 kîlo û nêm esrarî reyde gêrîyayê.