Îraq de Hewt Serran de 230 Rojnamegerî Kişîyay

Serra 2003 ra nat Îraq de 230 rojnamegerî ameyê kiştiş. Rojnamegero tewr peyên ke Îraq de ame kiştiş, Mazîn Merdan el-Bexdadî yo.

Goreyê reqemanê ke Rêxistina Rojnamegeranê ke Sînoran Nêşinasnenê (RSF) dana, rijnayîşê rejîmê Sedamî ra nat, yanî nê 7 serranê peyênan de, Îraq de 230 rojnamegerî ameyê kiştiş.

Goreyê xebera ajansa Reutersî, rojnameger Mazîn Merdan el-Bexdadîyo 18 serre ke Mûsil de televîzyonê El-Mûsilîye rê xebitîyayêne, roja 21 teşrîne 2010 de hetê hîrê merdimanê çekdaranê nenasan ra keyeyê ey de, verê çimanê merdimanê ey de ameyo kiştiş. Rojnameger Mazîn Merdan el-Bexdadî xebatkarê televîzyonê El-Mûsilîye yo dîyîn o ke hetê merdimanê çekdaran ra yeno kiştiş.

Rêxistina Rojnamegeranê ke Sînoran Nêşinasnenê (RSF) ke merkezê aye Parîs de yo, kiştişê rojnameger Mazîn Merdan el-Bexdadî protesto kerd û da zanayîş ke badê mudaxeleyê DYA ra hetanî nika rojnamegerê ke Îraq de ameyê kiştiş, se ra 99ê nê cînayetan bêceza mendê.