Raywana Şewe

Dayê va “Ti senîn a?”

Mi vat, “Ez zaf rind a. Ti mi qet meraq meke.”

*

Dayê, ez wela xo ra dûrî de qet rind nîya. Çimê mi her şewe xo çarnenê zerrîya mi û mi rê hewnî benê heram. Wexto ke tîje dinya ra bar kena, wexto ke dinya homete şona hewn ra, ez bena raywana şewe û çimê mi lêl de vînî benê. Hedera mi nîna. Zereyê mi de estora bêwayîre fetilîna. Solix mi de nêmaneno. Mi ser o qefelîyayîşê cuye maneno û ez sewbîna cuye ra solix tirena.

Dayê, çimê mi merdene ra pirr ê. La ez oncî çimanê xo ra domanê merdeyî verdena şewe. Mezelxaneyê merdimîye merdûnê mi ra beno pirr.

Dayê, îta vewre çin a. Vila verê vewre bê vewre bena?

Ez her şewe destûnê xo kena derg û rîyê aşme ra yew kefa vewre cêna. Seba xo, seba to, seba ezbeta ma…

Ez çinbîyayîşê xo kena ser. Boya vewre şewe de bena vila. Boya vewre mezgê mi de bena vila.

Zereyê şewe lawayîşê kutikûnê veyşanû ra pirr o. Lawayîşê înan ra leşa mi lerzena. Ez bena raywana şewe û sîya aşme de seba hewnûnê rindekû çilû nana ro. Şodir oncî mi nêvîneno…

Û ez zî hewnê xirabinû vînena. Rîyê hardî mi rê xora teng o, endî rîyê asmênî zî bîyo teng. Roj bî roj sîya şaristanan ginena rîyê mi ro. Ax dayê! Rîyê teynayîye sey çeleyê zimistanî zaf serdin o. Zerrîya mi cemedîna.

Dayê, ez qewmê xo ra dûrî de qet rind nîya. Ez rîyê xo çarnena asmênê tarî û Heqî ra pers kena: “Heqo, nê hewnê xirabinî çiqas derg ê? Şodirê nê hewnûnê xirabinû kotî yo? Çimê mi key rindekîye vînenê?” Ez cewabê persê xo nêpawena. Yew dejo tenik kena çengeyê rîyê xo û şewe de qayîtê rêça xo kena. Qayîtê rêça xo ya bêwayîre kena…

Dayê, ez qet rind nîya. Wexto dirîyayî de bîlasebeb rayîr kewt çimanê mi û ez rew domanîya xo ra vişîyaya… Bîlasebeb teyrû zerrîya mi terk kerde û ez rew mîyanê zele-mele de menda.

Dayê, ez xo rê hesîrê çimanê xo ra bextîyarîye virajena la yew va êno û rijneno. Hênîye çimanê mi asmênî awe dano la asmên yew dilapa awe mi nêdano. Ez hîna doman a dayê. Zûrê min ê tewr rindekî nêqedîyay, nî rastî kî mi rê zaf giran ê.

Dayê keyê na xirabîye çin o? Çayê her wext mi dima geyrena? Çayê merg hendayê hewnê şewe mi ra nezdî yo?

Mi emşo meqes girewt porê xo yo deg û sîya qesna. Mi hêvî kerd ke barê mi beno şenik. Mi dî ke, mi sewbîna leteyê domonîya xo birnayo...

Dayê, to vatenê “Lulika adirî seba eşqê adirî xo veyşnena” Ez seba kamî veyşena dayê?

*

“Ti mi qet meraq meke. Ez keynaya asmênî, ez vila verê vewre, zaf rind a…”(*)

__________

(*) No nuşte hûmara 14. ya rojnameyê Newepelî, rîpel 6 de weşanîyayo