Resam Mehmûd Celayîr Pêşangeh de

Resamo kurd Mehmûd Celayir yewendesê gulane de bajarê Almanya Bonn de bi nameyî “ILLUSION – NATUR” pa 9 resamanî xerîban a yew pêşangeh akerd. Nê pêşangehê enternasyonalî de xêrcê resmanî Mehmûdî resmî new resamanî neteweyanî cîya-cîyayan ra zî ameyî nîşandayîş.

Pêşangehê “Illusuin – Natur” ke yew mektebo kehen de virazîya, hetê serokî beledîyaya Bad – Godesbergî ame hedrekerdiş. No pêşangeh yewendesê gulane de bi qiseykerdişî serokî beledîyayê Bad- Godesbergî A. Schwolen Flümannî abî. Qiseykerdişî birêz Flümannî ra pey pîyanîst Stefanie Poortî yew konser pêşkêş kerd. Waharê galerî xanim Judith Andrea zî hedrekerdişî pêşangehî û bitaybetî zî resamî û resmanî înan ser o malumat da. Cuwa pey mêmanan resmî ke odayanî cîya-cîyayan de amebî dardekerdiş, temaşe kerdî.

Tîya de di resmî Mehmûd Celayîrî ke tebîetî Kurdîstanî anî çimanî ver ameybî dardekerdiş.

Pêşangehê “Illusuin – Natur” bi sponsorîya beledîya Bonn, serokî Odaya Endustrî û Tîcaretî (IHK) Wolfgang Greisse û mudirî mektebî muzîkî yê Keyeyî Beethoven Dr. Solvieg Palmî ameya hedrekerdiş.

No pêşengehê “Illusuin – Natur” beyntarê 11 gulane - 21 hezîrane de akerde yo.

Mehmûd Celayîr 1950 de Çewlîg de ameyo dinya û 1972 de Îstanbul de akademîyî hunerî qedênayo. Heta nika Tirkîya, Almanya, Fransa û Îtalya de xeylêk pêşangehî şexsî û grûbî akerdî û çend zî xelatî girotî. 1986 ra nat 20 serrî ra zêdeyêr Almanya de bajarî Stuttgartî de ciwîya. Nika Îstanbul de ciwîyeno û xebatê xo ya hunerî domneno.

Cayî Pêşangehî:

Galerie Judith Andrea

Bachhöfe – Paul-Kemp-Str. 7

53173 Bonn