Rindîye û Xirabîye

Yew roj Îtalya de kardînalî pêser benî û vonî, ma yew resam veynî, wa şamîya şewa peynî ya Hz. Îsayî resm biko. Kardînalî tayê merdimon pêser kenî û vonî, ewtayon a kam ke resam o, pêser bikî bîyarî. Merdimî şonî geyrenî çiqas ke resamî estê gênî onî. Kardînalî ewnînî yîn ra, tewr rind Leonardo da Vîncî vijnenê. Ey ra vonî, ti şamîya şewa peynî ya Hz. Îsayî resm bike û o zî qebul keno. Leonardo da Vîncî, yewendes hawarîyanê Hz. Îsayî resm keno. Monenî Yehuda û Hz. Îsa…

Mîyan de epey wext vîyareno, Leonardo da Vîncî şono opera û yew merdim opera de deyîron keno. Ewnîno ey ra ke rîyê ey zaf rind o, zaf temîz o. Vono eke bibo in şêno portre de cayê Hz. Îsayî bigîro. Merdimî ra vono, eke ti qebul kenî ez to portre de herinda Hz. Îsayî de resm keno û merdim zî qebul keno.

Da Vîncî pêrune resm keno, moneno Yehuda. Herinda Yehudayî de zî geyreno merdimêk ke ridê ey de rindîye, biexlaqîye û temîzîye çin a ê wazeno. Çunke Yehudayî Hz. Îsayî rê îxanet kerdo ya, o semed ra inawa yew merdimo nêviraşte geyreno.

Mîyan ra hîrê serrî vîyarenê, da Vîncî geyreno nêgeyreno o hawa yew merdimî nêveyneno. Kardînalî zî yenî ey het vonî, ti se kenî bike in resmî temom bike! Ewnîno nêbeno, di-hîrê merdimon gîno xo het, şono mehlonê pîson ra geyreno. Yew kuçeyo teng de, ownîno yew merdim eke destê ey di şuşeyê şerabî û xo de nîyo, bêhêş o, cilê ey pêro dirateyî, rîyê ey pîs o. Merdimonê xo ra vono, inî bigîrî bîyerî. Vono, o merdimo ke ez geyreno ino yo.

Merdimî gênî onî atolye û da Vîncî başle keno ey resm keno. Portre êdî ha qedîyayîş de ya, o merdim hêdî-hêdî yeno xo. Merdim warzeno pay, ewnîno portre ra vono, ez în portre şinasneno. Da Vîncî vono, ti kore ra şinasnenî? Merdim vono, ina ra hîrê serrî ver şima omeyî bînaya opera de ez girewta û arda owta, herinda Hz. Îsayî de rîyê mi resm kerd.*

_________

*No nuşte "Newepel, Rojnameyo Kulturî yo 15 roje, Hûmare 37, Dîyarbekir, 16-30 Êlule 2012, 3" de weşanîyayo.