Roja Ziwanê Dayîke Dîyarbekir de Ame Pîroz Kerdene

Bi munasebetê roja ziwanê dayîke yê cîhanî roja 20.02.2011 de Dîyarbekir de çend aktîvîteyî virazîyay. Seke yeno zanayene, serra 1999î de Rêxistina Zanist, Perwerde û Kulturî yê Yewîyîya Neteweyan (UNESCO) roja 21 sibate sey roja ziwanê dayîke qebul kerdbî û a roje ra nat her serre na roje yena pîroz kerdene.

Bi munasebetê roja ziwanê dayîke yê cîhanî, Dîyarbekir de aktîvîteya yewine hetê HAK-PARî ra ameye organîze kerdene. Aktîvîteya dîyine zî hetê derûdorê DTP ra virazîya.

Grûbêk endamê komela Çira semtê Ofîse yê Dîyarbekirî de saete 12:00 de kom bîy û derheqê ziwanê dayîke de yew beyanatê çapemenîye vila kerd. Dima zî xortan cenayîşê erbaneyî reyde deyîrî vatîy, sloganî eştîy û govende girewte.

Beyanatê çapemenîye hetê serekê komela Çira Newzat Karageçî ra ame wendene. Newzat Karageçî beyanatê çapemenîye de bale ante rewşa ziwanê kurdkî ser û va: “Ez destpêk de naye vajî ke UNESCO raporan vila keno vano qismêk ziwanî cîhan de benê vindî. Labelê seba ciwînayîşê ziwanan tu programêkê UNESCOyî çin o.”

Newzat Karageçî bale ante polîtîkaya dewleta Tirkîya ser û va: “Bîy 88 serrî ke Tirkîya ronîyaya. Nê demî de 20 ra vêşêr ziwanî mirênay. A roje ra nat hertim zulm û tada ro ziwanê kurdkî zî kerd. Dereceyê faşîzmî de kurdkî qedexe kerde. Meselaya ziwanî de Tirkîya, peymanê mîyanneteweyî ke îmza kerdê zî îhlal kerdîy.”

Newzat Karageçî qiseykerdişê xo de va: “Ziwan nasname û rûmetê miletêk o. Asîmîlasyon zî sucê vera merdimîye yo. Ganî Tirkîya fek polîtîkaya xo ya asîmîlasyon, red û înkarî ra verado. Ma wazenê ke kurdkî heme dezgeyanê dewlete de bi hawayêko resmî bêro gurenayene û bibo ziwanê perwerdeyî.”

Newzat Karageçî peynîya qiseykerdişê xo de zî xîtabê miletê kurdî kerd û va: “Seba ke polîtîkaya red, înkar û asîmîlasyonî veng ra vejîyo ganî şarê ma zî bi kurdkî qisey bikero, bi kurdkî binuso, bi kurdkî biwano, bi kurdkî bifikirîyo û bi kurdkî biciwîyo.”

Aktîvîteya dîyine ke hetê derûdorê DTP ra virazîya, sey yew panelî, salona beledîya şaristanê girdî yê Dîyarbekirî de saete 14:30 de dest pêkerd. Panel de serekê sendîkaya Egitim-Senê Dîyarbekirî Abdurahman Karahan, serekê beledîya Sûrî yê Dîyarbekirî Abdulah Demirbaş, parlamenter Osman Ozçelik û Mulkiye Birtane beşdar bîy. Nê panelî de Abdurahman Karahanî bi kirmanckî qisey kerd.

Heme beşdaran bale ante muhîmîya ziwanê dayîke ser.  

Mîyanê qiseykerdoxan ra qiseykerdişê serekê beledîya Sûrî yê Dîyarbekirî Abdulah Demirbaşî balkêş bîy. Abdulah Demirbaşî va: “Ma sey beledîye wazenê ziwanê kurdkî, her di lehçeyan, kurmanckî û kirmanckî pîya bigurenîn. La ganî şar bi xo ma ra biwazo ke ma xizmetê kurdkî bikerîn. Gama ke şar bêro erzuhalan bido ma, a game ziwanê dewlete vera ma de kilm beno. Eke ma xo ver o tayê çîyan bikerîn, dewlete vana, şar nêwazeno şima xo rê xo ver o kenê. Û pay dana vileyê ma ser.”

Peynîya panelî de gelek beşdaran zî fikr û pêşnîyazê xo îfade kerdîy. Çîyo zaf muhîm, zafê beşdaran bi kirdkî qisey kerd û fikrê xo îfade kerd.

Roja 21.02.2011 de zî pêşengîya Kurdî-Derî de bi beşdarbîyayîşê gelek dezgeyanê bînan yew numayîş ame organîze kerdene û bi hezaran kes beşdarê numayîşî bi.

Numayîş de yew beyanat hetê berpirsîyarê Kurdî-Derî Rifat Ozturkî ra ame wendene. Rifat Ozturkî va: Bîy 88 serrî ke ziwan û kulturê kurdî yeno înkar kerdene. Vanê yew ziwan, yew milet û bi no qayde miletê kurdî înkar kenê. Serekwezîr Erdogan seba des hezarî tirkanê ke Almanya de ciwîyênê vano ‘asîmîlasyon sucê merdimîye yo’ la 25 mîlyonî kurdan înkar keno. Nika ma naye taleb kenê: yan wa perwerde teslîmê beledîyan bikerê yan zî çi îmkanê ke pêşkêşê tirkî kenê wa seba kurdkî zî pêşkêş bikerê.”