ROŞANÊ NEWROZÎ

Newroz di qiral Cemşîdê gird ra nat

Keyna dêwê hênî rê kerdên xelat

Dêw kişto, xelesnay hênî w welat

Ard aramî, weş azadî û felat

Ceneto weş Tewrat tîya mojneno

Verê Dîcle û Feratî d’ awan o

Bawkal Adem tede sayêr ronano

Dayka Hewa say-wer, newroz mijdan o

Newroz gemîya tofanê wisaran

Borane geyrena gort û qesaran

Ca dîyo Nûh, Cudî; koyê adiran

Tofanê şayî yo, nî ê hesiran

Newroz sindan û çakuçê medîyan

Roşanê way-biratîyê miletan

Feraset dayo dewij û cematan

Şarezayê şeheran û welatan

Newroz gemîy hewa, awe û erdan

Dermanê gan, gonîya her ganîyan

Newroz helm û boya weş a wareyan

Haye û hişmend kerdişê her çîyan

Newroz berengeyê perçîn Aden o

Royê risqanê ser’ rîyê erdan o

Newroz biratîyê bizan-vergan o

Ganîyan di vindarnayîş mergan o

Newroz koşkê îlmî û zanayîşan

Kureyan di areqê kurewanan

Xebata seqakerdişê kezeban

Destpêkerdiş arê vistişê karan

Newroz kar û gureyê rencberan o

Serrewext debareyê kîyeyan o

Ber arêdayîşê morceleyan o

Neqş antişê hinganê kuwarîyan o

Zimistanan dayka xoza rakewna

Hewnê xo di kapusan vînena

Zerr’ kena teng, dana xo ri, bermena

Newroz ame fek kena beş huyena

Cuyayîş serr’ dest pêkeno newrozan

Ternayî mevêşnîn guna w’ wisaran

Leyeka meyweyî ronên her cayan

Lûl-weqf bikîn, beno xeyrê merdeyan

Newroz newe ra bîyayîşê ma yo

Estûna mundê cuyayîşê ma yo

Ax û bermî caverdayîşê ma yo

Zulmkaran ra xelesyayîşê ma yo

Newroz rojê serê koyanê berzan

Tîja azadî şewq dana fehmlerzan

Roşnîya şewqê çilaya pîrozan

Wayîr nezanê xo çinîk o xo bizan

Xemelnayîş, têbestîş xoza weş o

Boya vilan weş biancên gan-leşo

Homa newroz bextê ma rê bibexşo

Adiro gurr wekîn wa tim biveşo

Newroz ame mubarek bi şew-rojan

Adir û çilayî şewq danî mezgan

Şîreto gird goş dayîş pîr û kalikan

Ganî-merde yad bikîn her newrozan

Newrozo pîroz ma rê beno roşan

Kîyeyê xirabîye per-perîşan

Xo demeverd bêziwan vêşan-têşan

Jehrê tarîye ra gîrane weşan

Wisarî şewa vîst û yewê edarî

Vart varena eşq û adir laserî

Teyr û turî agêrayî wisarî

Newroz ame zerran zîl da teverî

Muzîkvanî deyîran weş cenenî

Qij ra pîl têdest di govend kay kenî

Homay rê lomeyê bereket kenî

Roşanê xoza di murad wazenî

Newroz ame adir webi deyeyan

Mîjdana weş da xort û keynayan

Şar werişt, bîy gijaleka şayîyan

Kewtî eşqê roşanê serê koyan

Rojakewte ewnîyenê rojawan

Verroj ra heta zime kîye awan

Vilikî newroz akerdî reng ziwan

Newezayê zerrweşê roj û şewan

Ziwan kenê derg qirçenê sey qela

Sil raşenî biewnên kirtê dela

Her yew vano newroz ma yo hela

La newe zazakîyê ma rê qewl a

Newroz roşan û veyweyê nê cayan

Govenda adirî kilê zerrîyan

Werêameyîşê qewm û miletan

Mubarek bikîn newrozê kirdan