RUHÊ BAJARAN ZÎ ESTO

Serre 2010, goreyê hesabê verênan diwêsê aşma gulane bi. Rojan ra yan çarşeme yan pancşeme la verê camîyan seke qelabalix asayêne herhal îne bi. To fîstanê xo yo tewr rindek dabi xo ra, to vatêne “boya dayika min û boya şaristanê mi ci ra yena.” Porê to akerde, seke gilê valêre Munzur de têşîyeno ameyne rîyê mi ser. Ma Garapêtê Xaçoyî goştaritêne, qasê nê koyan vengêko efsunin, qasê ruhê ma vengêko birîndar. Ancî goreyê vateyê verênan no bajar ruhê tebîetî bi. La min û to nêdî belkî ma nêvînenî zî. Rengê xo koyan û çemanê xo ra girewtbi. Ax zerrîya koyan daxnaya, her tîtalikî ser o yew qûle, çemo azad kerdo hepsî, roje bi roje rengêk mireno. Derba nê bajarî xorîn de ya, nezan senî bivîno! Awirê ma ginenê melodîyanê Munzurî, zergunîya daranê mazêran, awirê ma ginenê yewbînan, ax ez û ti ma teyrê perşikteyî. Emrê şayîya ma kilm o, sey gulnîxwînanê ke Koyê Munzurî xemilnenî. Ma caran nêresayê xeyalanê xo. Herrîya xo ra dûrî, ax herrîya xo de ma xerîb! Ma bîyê parçe-parçe, ma bîyê xîç û niheyî û lêr bîyê dûşan ra.

To vatêne “Ez û ti ma henzar kîlometreyî yewbînan ra dûrî bê zî eynî dejan ser o henzar rey ma hesiran rişnenî…” Ma heme tehman ra dûrî mendî, heme vengî zerrîya ma de bî şîware, ax heme rengî çimanê ma de… Qandê heme vengê qedexeyan, wa mergê ma tîya de bo. Seba nalînîya Munzurî, seba vengê linganê pezkovîyan, seba raştî; raştîya ma ax vengê estikan. La îhtimalêko dûrî yo ez zana, ti zana. Her rindîye ma ra dûrî.

Yew vîrameyiş beno xulasaya heyatê însanî. Ha to rê, ez hewna tîya de ya, serre 2017, goreyê hesabê verênan ney la adar a. Ez temaşeyê lêlîya Munzurî kena, temaşeyê rîyanê esmeran û dirbetinan, tebîeto bêgan, asîmano xumamin, her çî ha neçar her çî birîndar. Her kuçe ra tewr zaf panzerî vîyarenê, awirê mi veng-varitî, zerrîya mi sey bîro ke kemerî debiyê. Na herrîya min a, ez nas kena la nê însanî kam î? Kamca yo şarê mi, ti kamca ya? Kamcîn tablet mi ano to het, kamcîn rêçe ser o qewmê mi? Ez  nika dinya ra dûrî ya, to ra dûrî, vîrê Dêrsimî de… Vengê Garapêtê Xaçoyî beno Zulfîqar û ruhê mi de şino war. Ez û Munzur ma hesiran rişnenî, Dêrsim seraser beno keder, beno birînêka hare. Çend henzar kîlometreyî esto bêntarê ma de, ax hesirê to ha damaranê kamcîn herrî ra şinê war?

Dêrsim, 03.03.2017

Eno nuşte "Newepel, Hûmare 100, r. 3" de weşanîyayo.

YASAL UYARI: www.zazaki.net kaynağında yayınlanmış herhangi bir haber, yazı veya fotoğrafın site editöründen izin alınmadan olduğu gibi kopyalanarak ya da üzerinde çeşitli oynamalar yapılarak herhangi bir yerde yayınlanması; farklı çalışmalarda alıntı olarak kullanmak amacıyla cümle veya paragrafların kopyalanmasında ise standart bir şekilde kaynak belirtilmemesi durumunda hukuki süreç başlatılacaktır!