Şaîr Mem Zindan de Nêweş o

Şaîr û nuştoxê kirdkî Mela Mehemedê Mela Evdilxefûrê Hezanî (Mehmet Şanlı) ke hem dewij hem zî feqîyê Ehmedê Xasî yo û bi mexlesê “Mem”î nuseno, bî di serrî û hîrê aşmî ke zindanê tîpê D yê Dîyarbekirî de hefsî yo. Emrê xo 75 serre yo, verî ke bigêrîyo çend rey sekte ginabi qelbê ey ro, nika zî hefsxane de hem qelbê xo ra hem zî tansîyonê berzî û çimanê xo ra nêweş o. Raporê eyê nêweşîye pêşkêşê tibê edlî yê tirkan bîyo û o bi xo nêeşkeno îhtîyacîya xo bivîno la ancî zî hefs de yeno tepîştene.

Seba serbestveradayîşê şaîr Memî û heme hefsîyanê nêweşan şima zî yew îmza bidîn.

Seba îmza nê lînkî bitikne:

http://imza.la/hasta-ve-yasli-tutsak-mehmet-sanli-ya-ozgurluk

ŞAÎR MEM KAM O?

Mela Mehemedê Hezanî serra 1938 de nehîyeya Licê Hezan de maya xo ra bi. Babîyê ey Mela Ebdulxefûr melayê Hezanî bi. Ey verê babîyê xo de dest bi wendişê erebkî kerd. Dima gama ke serra 1949 de Hezan de reya verêne wendege virazîya, ey zî eynî serre dest bi wendişê tirkî kerd. Badê ke panc serrê wendegehê verênî temam kerdî, na rey teberê Hezanî de dest bi wendişê medresa kerd. Ewilî Dîyarbekir de medreseya camîyê Hezretî Umerî de verê Mela Evdisemedî de wend. Dima Licê de Mela Evdilayî het wend. Badê pey zî medreseyê dewanê sey Balicne, Metranî û Kemberlî de wendişê xo dewam kerd. Qederêk zî Bismil û Mêrdîn de wend. Peynî de dewa Dîyarbekirî Baroxlî de wendişê xo temam kerd û serra 1969 de ey dewa xo Hezan de dest bi melayîya resmî kerde. Wezîfeyê xo yê melayîye sere ra hetanî ke serra 1992 de teqawut bi, ey seranser dewa xo Hezan de kerde.

Mela Mehemedê Hezanî serra 1969 de dest bi nuştişê şîîranê kurdkî kerd. Ey reya verêne kitabê xo Mecnûn û Leyla bi lehçeya kurmanckî nuşt. Kitabê ey Eqîdetul Îmanî, verî bi lehçeya kurmanckî serra 1980 de nuşt, dima bi lehçeya kirdkî (zazakî) serra 1981 de nuşt û ey bi xo nê her hîrê kitabê xo metbea de çap kerdî. Ey nê kitabê xo bi alfabeya erebkî nuştê.

Eserê eyê ke metbea de çap bîyê nê yê:

1) Mecnûn û Leyla (kurmanckî), Dîyarbekir, 1979, 54 r.

2) Eqîdetul Îmanî (kurmanckî), Dîyarbekir, 1980, 27 r.

3) Eqîdetul Îmanî (kirdkî), Dîyarbekir, 1981, 30 r.

Mela Mehemedê Hezanî

Resmê qapaxê kitabanê Mela Mehemedê Hezanî:

Mecnûn û Leyla (kurmanckî), Dîyarbekir, 1979, 54 r.

Eqîdetul Îmanî (kurmanckî), Dîyarbekir, 1980, 27 r.

Eqîdetul Îmanî (kirdkî), Dîyarbekir, 1981, 30 r.