Se ra 15ê Nufûsê Dîyarbekirî Seqet ê

Bi munasebetê Roja Seqetan ya Cîhanî ke roja 3 kanûne ya, hetê Platformê Seqetanê Dîyarbekirî ra yew kombîyayîşê çapemenîye ame organîze kerdene. Berpirsîyarê Komela Dezgeyanê Taybetan yê Perwerdeyî Selîm Kaplanî kombîyayîş de qisey kerd û da zanayene ke hûmara seqetanê Dîyarbekirî rêjeya seqetanê Tirkîya û yê cîhanî ra vêşêr a.

Selîm Kaplanî va, “Cîhan de tarîfê ‘seqet’an termêko zelal nîyo. Tarîfê seqetan ke Paymana Heqanê Seqetan de esto û na peymane hetê Yewîyîya Miletan ra qebul bîya ke Tirkîya zî na peymane îmza kerda, nê tarîfî de sînor çin o. La Tirkîya de seba ke seqetêk heqanê sosyalî ra îstîfade bikero ganî hetê heyetê doktoran ra raporê se ra 40 ra cor seqetîye bigêro.”

Selîm Kaplanî beyanatê çapemenîye de da zanayene ke, goreyê reqemanê Rêxistina Tenduristîye ya Cîhanî (WHO) ra dinya de 500 mîlyon seqetî estê û va, “Goreyê hûmaritişê serra 2002 ra, se ra 12.29ê nufûsê Tirkîya seqet ê. Yanî Tirkîya de heşt mîlyon û nîm seqetî estê. Labelê nufûsê Dîyarbekirî se ra 15 ra cor seqet ê. Seke aseno, hûmara seqetanê Dîyarbekirî rêjeya seqetanê cîhanî ra zî, yê Tirkîya ra zî vêşêr a. Helbet sedemê naye xizanî û rewşa şerî ya.”