Sedemê Nêameyîşê Hewnî

Lajey Rehmî, Xelîl, tîya ra nizdîyê hîrê seyî serrî ra ver dewa Sîmserkîsi de ciwîyayo. Neslê hewtin ra bawkalî min o. Dizdîya yi derûdor de vengûn dawo. Rojek dijni (şîlî) zaf varena, we nîşkîyeno keye ra vecîro teber. Şew dîyena, we kuweno cil ke xu rî rakuwo la hewnê yi nêyeno. Mîyanê cili de xu na heta, a heta dûnû, se keno çi keno ancîna hewnî yi nêyeno. Cil ra vecîno, wardeno pay û zereyê oda de ragêreno. Sedemê nêameyîşê hewnî ser o fikirîyeno. Peynî de xu bi xu vûno, “Eyro dijni hetûn yerê varaya, ez nêşkîyo vecîro teber, mi eyro dizdî nêkerda. Aw semed ra emşo hewnê mi nêyeno."

We ca de kincûnî xu pira geno, keye re vecîno teber. Teber a gêreno, cayê çîyê dizdî nêveyno, şûno serî bonê birayê xu Sofî ser, bangêrê yi tiraweno, erzeno xu kiftî ser û beno binê dewi de erzeno qurney gozêri. Heleki ser di nêşûna, banê Sofî dalpey keno. Sofî vecêno banî xu ser ke ban biçarno, ewnîyeno ke bangêri çin a. Sofî fikirîyeno fikirîyeno, peyni de xu bi xu vûno “Bibo nêbo ino gure gurey Xelî yo. Bê xêrba Xêl kes ino hewa gure nêkeno."

Ca di ban ra yeno war, hetî keyê Xêl ra şûno. Xeli zî keye di hema newe newe girê hewnî girewto. Yeno bêrî ver, dûno ber ro, vûno:

- Xelo! Tu bangêrê mi se kerda, berda ça?

Xel vengî birayê xo Sofî ser o beno haye û tira vûno:

- Lîya bira mi bigêr, hema newe mi hewn girewto.

Sofî vûno:

- Lîya Xelo, wilay dalpû ma kerdî teber. De ti qey Homay kên, cayê yê vaji, ez xu rî şiyero biyaro.

Xel vûno:

- De mi bigeyr lîya lajek, ez pey bangêrê tu se bikero. Bangêrê tu ha binê dewi di zereyê qurney gozêri di ya.

In vateyî ser o Sofî bi lez vaz dano hetî gozêr a. Ewnîyeno qurn ra, eke bangêr ha tede ya. We devrîyeno la nêşkeno bangêr qurney gozêri ra veciro, heyna peyser ageyreno, berî Xêlî kuweno û vûno:

- Xelo lezi şime ti senî hawa bangêr devista qurni, heyna ay hawa veciri bîya cayê ya.

Iney ser Xel ewnîyeno çare çîn o, cil ra vecêno û dûno purî şûno bangêr qurney gozêr ra veceno, heyna beno herindê ya de verdûno.*

___________

*No nuşte “Newepel, Rojnameyo kulturî yo 15 roje, Hûmare 23, Dîyarbekir 16-29 sibate 2012, r. 5” de weşanîyayo.