Sereyê Weşî rê Nuşte Meker!

Serranê newayan de rojêk gerillayî mintiqaya Dara Hênî de şinî yew dewe, yew keye ra erzaq genî. Wayîrê keyî xebere dano muxtarê dewe vano, emşo mehkumî ameyê keyê mi û nan girewt şîy. Ti şo xeber bide qereqol. Muxtar vano, to nan da! Eke dewijan zî kesî nêdî, tu mişkuli tede çin o, vengê xo meker, wa kes pênêhesîyo.

Mêrdek vano eke ti nêşîyrî qereqol ez şina, badê ke dewlete pêbihesîyo do sereyê mi bidejno.

Muxtar şino xebere dano qereqol, eskerî yenê dewe, mêrdekî ra vanî, hela vace, çend tenî bîy, senî bîy, derg bîy yan kilm bîy, neçar bîy yan xo ser o bîy. To ra va se û çina waşt, kam het ro şîy, hama lez ti ma rê yew bi yew vace.

La tirkîya mêrdekî çinê bî, o pawe yo ke dewijî ey ver ra xeberî bidî ama muxtar û dewijî zî xo gure ra dûrî genî, vanî, ma tu çî nêdî û nêeşnawit. Mêrdek verba sualanê qumandanî de beno xînt, nêzano se vaco. Qala yew tirkî yew kirdkî keno têmîyan, wazeno vaco ez serê balkone de bîyo û ê heme cêr de bîy, çimê mi ver de pêro seypê bîy. La vano, qumandan, wilay ben yukarida onlar aşağıda çimlerden hepsi eynisin… Û tirkîya ey qedîyena. Qumandan vano qey mêrdek ha pey ey yarî (leqerdî) keno. Qumandan bi hêrs hêriş keno, pay-paşkilî dano piro. Qîreno mêrdekî ser vano, lez cewab bide mi neke ez to bero qereqol.

Dewijî ewnîyenî ke mêrdek nê gurî mîyan ra nêvecîyeno, dewijî vanî, qumandan no dewijê ma hebê delu yo (xêv o) nêzano ha vano se. Kes nêameyo dewa ma. Dewa ma ha rayîrî ser o ya, beno ke raywan yan zî bazirganî tîya ra vîyartê, o vano qey gerîla yê.

Mêrdek vano, yaw ez qopa xo delu yo, delu çi yo? Şima çi vanî o delu yo! Vacîn, o tirkî nêzano tirkî.

Dewijî heyran-qurban kenî, mêrdekî berdişî qereqolî ra xelesnenî û vanî, wa no to rê derse bo, hewna sereyê weşî rê nuşte meker.