Şewa Hetkarîya Vateyî Serkewte Vîyarte

Şewa Kulturî ya Vateyî, heştê menga teşrîne 2013 de paytextê Almanya Berlîn de ame amadekerdene. Şarê ma yê nê bajarî eleqadarîyêda başe nîşan da, salona ke 300 kesî gêna bîye pirr û semedo ka ca çin bî bi desan kesî zî peyser gêrayî ra.

Moderatorîya şewe hetê Fîgen Kocadaxe ra ame kerdene. Bi kirmanckî û almankî silamkerdişî ra pey, dengbêj Sevgî Yurtsever bi hevalê xo Yurtseven Özdemîrî ra ameyî sehne. Nê hunermendan nêzdîyê saetê bi kirmanckî û kirdaskî programêde balkêş amade kerd.

Amadekerdoxê şewe, Temsîlkarîya Vateyî ya Almanya bîye. No semed ra nê hunermendan ra dime moderator Fîgene temsîlkarê Vateyî yê Almanya Daîmî Bektaş dawetê sehne kerd. Daîmî, vîzêrî ra bi ewro, derheqê Vateyî agahdarîye da temaşekerdoxan û raverşîyayîşê ziwan û kulturê ma de rolê ey ser o vindet. Daîmî qiseykerdişê xo bi nê çekuyan qedêna:

“Rojê vernîya ma Gaxan o. Şarê ma ey ra Gaxan, Kalê Gaxanî, Serrnewe, Sersal ûêb, vano. Ez Gaxanê şima nika ra fîraz kenane û hevîdar a ke şima Gaxanê xo bi canweşî û keyf derbaz kenê.

Mêmanê delalî, Vate bi hetkarîya şima şikîno raver şêro û xizmeta ziwan û kulturê ma biramo. Ez hêvî kenane ke şima ewro ra dima kî Vateyî tena nêverdanê, kovara xo rê wayir vejînê, hetkarîya ey kenê, piştî danê ci.

Ez zaf sipas kenane ke şima zahmet kerdo, heta tîya amê, berxudar bê, weş û war bê.

Daîmî ra dima, serredaktorê Vateyî Munzur Çem ame mîkrofon. Munzur Çemî qeseykerdişê xo yo kilmek de verê veran seba amadekerdişê şewêda winasîye Temsîlkarîya Almanya pîroz kerde û va “Na game, no derheq de gama yewin a. Ez hêvî kena ke ewro ra pey şewê nîyanênî roje bi roje benê zêde, kar û xebata Vateyî raver şona.”

Munzur Çemî no mîyan de hem rewşa ziwan û kulturê ma ser o hem kî derheqê kar û gureyê “Grûba Xebate ya Vateyî” de haydarîye da goşdayoxan.

Mabên ra dima êdî dore amebî hunermendê ma yê namdarî Mîkaîl Aslanî û Grûba ey. Mîkaîl û hevalê xo nêzdîyê saet û nêm sahne de mendî, sey her timî programêde zaf weş û serkewte amade kerd.

Programê înan ra dime, moderatore bi nameyê Têmsîlkarîya Almanya goşdayoxan rê reyna sipas kerd û şewe bi bi no tore, bi atmosferêde zaf weş û delalî qedîye.