Îsmaîl Beşîkçî rê 8.5 Serrî Ceza Yena Waştene

Nuşteyê Îsmaîl Beşîkçî ke bi sernameyê “Heqê tayînkerdişê îstîqbalê neteweyan û kurdî” ke kovara Çagimizda Toplum ve Hukuk ke weşana Komela Huqûqkaranê Hemdeman a Îstanbulî (İstanbul Çağdaş Hukukçular Derneği) ya de weşanîyaya, bi sedemê ke propagandaya PKK ameya kerdene, ro ey dewa ameya akerdene û heşt serrî û nêm ceza yena waştene.

Îdîanameya ke hetê dozgerê komare yê Îstanbulî Hakan Karaalî ra amade bîya de yeno vatene ke nuşteyê Îsmaîl Beşîkçî de îfadeyê sey “Kurdî bîy 200 serrî ke seba azadî, seba welatêkê azadî mucadele kenê, bedêl danê… Sûrîye, Îran û Tirkîya kurdan bi zordarîye îdare kenê.” estê.

Îdîanamede yeno vatene ke Îsmaîl Beşîkçî nuşteyê xo de vato, “Vera prosesê na zordarî û zulmî de mucadeleyê kurdan heqêko meşrû yo” û bi no qayde cebr û şîdetî teşwîq kerdo, propagandaya rêxistine kerda.

Îdîaname de teleb beno ke Îsmaîl Beşîkçî û mudira karê nuştişî ya kovare Zeycan Balci bi heşt serr û nêm cezaya hepsî bêrê ceza kerdene.