Şîroveyê Wendoxêkê Zazakî.Netî

Na xebere de yeno vatene ke peynîya 10 aşman de axir Îraq de hukmat ronîya û ez zî binê na xebere de şîrove nusena…

Homa durist o û duristan ra zî hes keno…

Eke ez zî biduristî vajî, meseleya mi ronayîşê hukmatê Îraqî nîya û qet xemê mi zî nîyo… La ez paweno ke dilê şarê ma kirdan de, hukmatê xelaskerdişî yê nê ziwanê qedîm û bêwayir û bêqederî key ronîyeno!

Ax bira!

Çi qederê ma yo pîs o ke ma peynîya heme şaranê dinya de mendîy… Ez nêzana çira ziwan û kulturê şarî ma rê hende şêrîn o û ê ma zî hende tal û tirş o bira? Gelo no nuşteyê çareyê ma kirdan o ke ma gere ziwanê şarî tim û tim ziwanê xo ra rindêr qisey bikîn, zêdeyêr qîymet bidîn ci!

Ti ewnênî merdimî rê mîyanê orteyê hamnanî de selêk simer nêkeno, çira ke ziwan û kulturê ey aver şîyo, zêde yeno qiseykerdiş û nuştiş, qîymet vîneno, beno wayirê fehm û ferasetî û merdim hesebyeno… Ê to, la ê to bira? Çira ke tepîya mendo, aver nêşîyo, ti panc qurişî qîymet nêvînenî, wazenê ti hezar qat zanaye, ciwamêrd, welatperwer û wayîrê çewres kitaban be...

Axx bira axx! Ez nêvana la derdê mi vanî. Ti vanî ez welatperwer a û ti werzenî sereyê xo dejnenî, ziwanê şarî musenî, hende weş ti musenî ke hetê nuştiş û wendişî ra, zafê wayiranê ê ziwanî zî qasê to nêzanî. La ti çend aver şirî, her çî bêqusur bikî zî zerrîya to çizz kena, yew nalayişo tenik veng dano to zerrî ra…

Ti awir danî peynîya xo, ziwanê to ke dadîya to bi ey veng dabî to, pîrika to seba ke ti şirî hewn a, zimistananê serd û vewrinan de bi ey to rê sanikî vatbîy, o ziwan vinderto hende melul, hende bêwayîr û hende milşikite ewnêno to ra!... Ziwanê to yo qedîm beno gireyêk kewno qirika to, beno zincîrêk lefîyêno linganê to ra, beno kila adirî kewno zerrîya to…

Ti her çî ra remenî la ti nêeşkênî wijdanê xo ra biremî û peynî de ti mecbur manenî benî teslîmê wijdanê xo…

Ti hama newe zanî ke çîyêkê ti kenî, kêmanî tede esta, ti zanî ke ziwan zî sey însanan ganî yo, sey ewladêk o, hetta ke kulfetê to vêşan bo, ti nêeşkênî kulfetê şarî mird bikerî..

Ez serrneweyê şarê xo fîraz kena û hêvî kena ke serra newîye de şarê ma do hîna vêşî wayîrê ziwanê baw û kalanê xo bivejîyo...

Cemîl Ehmed

_________

Not: Ma şîroveyê nê wendoxê ma yê ercayeyî redakte kerd û weşana. Seba dîyayîşê şeklê orîjînalî yê şîroveyî tîya bitikne>>>