Teynayîye

Aşme bi rindekîya xo her şewe ginena zerrîya yew estareyî ro.

La çi heyf ke yew hetê aye bêeşq, tik û teyna naleno…

Na teynayîya kaybaze kotî ra vejîya? Qey mezgê mi de kay kena? Peleyê vewre mi rê gile koyan ra boya rîbêşan ana û maya mi ginena sêneyê mi ro.  Sêneyê mi de hurendîya zerrî de maya mi erzena ewro. Teynayîye dormeyê mi de geyrena û ez binê yew kaşî de pîyê xo pawena. Ez pîyê xo bermena ewro…

 Hetê min ê çepî de çîyê jan dano. Fekê mi de ziwanê mi beno lal û kerr. Yew wexto kan, yew wareyo tal, yew kutiko har yeno vîrê mi. Yew kêneke yena vîrê mi. Porê xo hende şewe sîya yo. Hende teynayîye. Û biskanê xo de dolê xo nimnena. Û asmên xo rê kena sitare.

Peyê mi de peznê linganê teynayîye û ez xo erzena kuçanê şaristanî. Sipîye vewre de persî sey vewrêsî zêdînê. Cewabî ginenê dêsanê teynayîye ro. Va yeno û beno. Rîyê her çî çimanê mi de beno rîyê teynayîye. Yew vila sûre qey nê çeleyê zimistanî de merdimî rê bena qisawete? No bermayîş kotî ra vejîya? Gelo na awa soline qey dirbetanê mi hende dejnena?

Mîyanê hende sixletîye de na teynayîye çi temaşe ya! Her çîyo rindek merdimî ra çiqas dûrî û çiqas nêzdî aseno. Vengê haskerdoxê verênî, rengê heba genimî beno meraq û gineno zereyê mi ro. Gelo tamê eşqî senî bî? Ya, boya vaşî?

Teynayîye! Hes...

Veng meke. Goş bide. Herra mi ra vengê domanîya mi yeno. Nika ziwanê mi qesey keno kuçanê şaristanî de. Ez ke teyna menda ziwanê mi, mi de qesey keno.

Û ti zana? Ez teyna o wext to ra hes kena tenayîye!*

______________

* No nuşte “Newepel, Rojnameyê kulturî yo 15 roje, Dîyarbekir 01-15 çele 2012, r. 6” de weşanîyayo.